Dizionari de Lenghe Furlane

esterni  /-èr-/  es|ter|ni  [AF]

1. adi. che al è fûr, che si viôt sul difûr, che al à a ce fâ cul difûr:  la part esterne de citât, intun ciert sens, e je il biliet di visite pal turist (Luca Zoratti, Passât gloriôs, avignî dubiôs); il vescul Elie (571‑586), al à alçât dut l'edifici e al à ristruturât sedi la part interne sedi chê esterne (Bepi Agostinis, Storie de art in Friûl); e àn scugnût puartâlu jù par une scjale esterne (Vico Bressan, Scaiis - Il Strolic furlan pal 1974)
   Sin. difûr , fûr , infûr , par fûr , par difûr
   
   1. che al rive dal difûr:  tal dirit di ducj i popui a guviernâsi sfrancjâts di prepotencis esternis (Antoni Beline, Friûl: no 150 agns da la Italie, ma "145 o 93"!); tai moments di crisi nol è nuie di miôr che vê un nemì, calcolât tant che «esterni» e «forest» (Marc Stolf, Un Friûl diferent e une Europe divierse)
      Sin. forest
   2. che si indrece al ambient difûr o a chei altris:  il codiç al insegne a osservâ un compuartament esterni che al rint pussibile la vite cun chei altris (Francesc Placerean, La Glesie e à di lassâ i popui come che a son e fâur di levan seont la lôr paste)
2. adi., s.m. che, cui che nol è membri di une organizazion, di une struture di vore e sim.:  une di chês che a fasin lis puliziis tes fabricutis che a dan a esternis chel gjenar di lavôrs (Igor Londero, Delit in vie del Lavoro); il probleme al è che cui che al rive di difûr (espert esterni) al à di inserîsi dentri di un cuadri orari za formât (Oscar Puntel, Furlan a scuele: la peraule ai insegnants)
   Sin. di difûr , difûr
   
   1. cui che al frecuente i cors di une struture scolastiche che no je la sô, dome par une cierte dade di timp
   2. candidât a un esam tune scuele che no je la sô:  al à frontât l'esam tant che esterni
   3. che nol fâs part di un partît o di une coalizion, ma al pues in ogni câs judâ cence condividi il program:  tensions in cressite jenfri la maiorance e la Çampe (Levica) che fin cumò e à garantide la poie esterne al guvier (Tjaša Gruden, Adria Airways, e falìs la compagnie aerie slovene)
3. s.m. part difûr:  [la cjase] e à il zardin biel grant, e je intune zone trancuile, e plâs la forme dal esterni (Valentina Pagani, Ristruturâ o fâ sù gnûf? Ce costial di plui?)
   Sin. fûr , par fûr , difûr
   
   1. [TS] sport tal balon, part dal pît che e je de bande contrarie rispiet a chel altri pît:  al tire cul esterni diestri sul pâl plui lontan e al segne (Marc Stolf, Udinese - Bologna 1-1)
4. s.m. ambient difûr, tant che ambient di interazion o tant che spazi viert fûr di une costruzion o di une struture:  intun stât di disabilitât grivie, il pazient ancje se cun grandis dificoltâts, al pues vê une interazion cul esterni (Christian Romanin, Amato De Monte: Il Friûl, patrie des bataiis di civiltât)
   
   1. puest che al è fûr, lontan di un altri:  cjalâ il Friûl dal esterni, prime de Toscane e dopo dal Sudtirôl, mi à fat rifleti fin dal prin moment sul gno jessi furlan (Roberto Pensa, «Furlan, strument di disvilup li che si à di invistî di plui»)
   2. [TS] teatr. senografie che e mostre un sît viert
   3. [TS] cinem. tal pl., riprese di un film cjapade fûr dai teatris di pose
5. s.m. [TS] sport tal sport dal balon, cui che al zuie suntune fasse laterâl dal cjamp:  l'Udin al fâs zirâ bale cun Walace che, denant de difese, al coordene lis operazions, slargjant il zûc in direzion dai esternis Srtyger Larsen e Molina (Marc Stolf, Crotone - Udinese 1-2)
   Sin. ale
   
   1. tal sport de bale tal zei, l'atacant che al zuie fûr de aree dai aversaris
   2. tal baseball, un dai trê difensôrs che a zuin fûr dal diamant