Dizionari de Lenghe Furlane

distance  /-à-/  dis|tan|ce  [FO]

1. s.f. misure dal spazi lineâr tra doi ponts, tra dôs robis, personis e v.i., o de stesse robe, persone e v.i., di un pont di partence a un di rivade:  lis frecis a podevin rivâ ae velocitât di 100 km oraris e lâ lontan fin a 200 metris. Si pense però che la distance buine e fos tor dai 30-50 metris (Andrea Pessina, Gaetano Vinciguerra, La preistorie in Friûl); [i doi rês dai scacs] a àn di mantignî simpri almancul une casele di distance un di chel altri (Nilde Teresa Negro, Zuìn di scacs); no rivavi a capî a ce distance che mi cjatavi dal vât (Checo Tam, Sense); une bombe e cjapà in plen un setôr de trincee a pocje distance di Zorç (Checo Tam, La trombe)
2. s.f. [TS] gjeom. segment di une rete che al unìs doi ponts
   
   1. segment di perpendicolâr comune tra dôs retis o doi plans che al à i estrems tes dôs retis o tai doi plans:  cheste e je la distance tra i doi plans
   2. segment di perpendicolâr tirât di un pont ae rete o al plan
   3. distance tra doi ponts dulà che lis retis a son taiadis de perpendicolâr comune
3. s.f. [TS] sport tes garis di corse, la lungjece dal percors:  un nadadôr specializât su lis distancis dai 100 e dai 200 metris di stîl libar
   
   1. tal pugjilât e in altri sport di lote, la durade dal incuintri:  un incuintri pal titul mondiâl, su la distance des 12 ripresis
4. s.f. il fat di jessi lontan:  si vuelin ben, ma a vivin lontan, fin che no cjatin une soluzion a àn di imparâ a sopuartâ la distance
5. s.f. spazi di timp:  tra la prime e la seconde vuere mondiâl e je une distance di uns vincjecinc agns
   Sin. diference , distac , salt¹
6. s.f. (fig.) il no someâsi, no jessi l'istès, il jessi diferent:  tra il dî e il fâ cualchi volte e je une grande diference, une distance che no podìn plui permetisi (Mario Dutto, Scuelis di cualitât e lenghis di minorance. Une riflession su la lenghe furlane intes scuelis); chescj sienziâts a àn misurât lis diferencis linguistichis dai grups (intal lessic e inte sintassi: distance linguistiche) e lis diferencis gjenetichis (distance gjenetiche) (Franc Fari, Eric Pascul, Autonomie e democrazie, i numars de socializazion umane)
   Sin. diference , divari , diversitât , svari , disparitât
7. s.f. pocje partecipazion emotive:  cjapâ lis robis cemût che a vignivin, cjalâlis di adalt, cun distance e cence passion (Carlo Sgorlon, Prime di sere)

Polirematichis e espressions idiomatichis

• a distance loc.av., loc.adi.inv.
• a distance di loc.prep.
• meti distance loc.v.
• tignî a distance loc.v.