date
da|te
[FO]
-
s.f.
indicazion di timp, in gjenar componude de zornade, dal mês e dal an, o ancje dome di cualchidun di chescj elements, par riferîi un event, un document e v.i.:
al veve cjatât la tombe di sô mari, une crôs di piere bielzà maglade des lichens, cuntune vecje fotografie smamide e une scrite di leton: non, date di nassince e di muart (Franca Mainardis, Il sium di Lissandri);
Liste dai membris de Fradaie dai Batûts di Cividât. Si trate di un toc di un document plui lunc che D'Aronco i met date il 1290 (Zorç Cadorin, Cualchi ipotesi sul furlan di prin di scrivilu);
al cjapà un bussulot di jogurt, al controlà la date e lu butà vie parcè che al jere scjadût (Franco Marchetta, Light my Fire);
un biel puarton par jentrâ tal curtîl cuntun arc di piere cuntune date su la clâf di volte: 1752 (Roman Michelot, La cjase dai contents)
-
zornade, dì:
si varès di pensâ di dâ ancje al Friûl la sô fieste nazionâl; che la date dai 3 di Avrîl, che e je chê de nassite dal stât feudâl furlan te suaze dal Imperi, ven a stâi de concession imperiâl al patriarcje di Aquilee dal titul di duche cu la jurisdizion ducâl sul Friûl, e sarès la plui adate par chel intindiment (Adrian Cescje, Memoriis di politiche linguistiche)
Sin. dì
, zornade1
-
in sens plui larc, dade di timp:
Lis datis di chestis estinzions, determinadis cun precision doprant il radiocarboni e altris gjeocronometris, a van parie cu la vignude dai nestris antenâts: la tigre cui dincj a sable e cetantis speciis di bisonts, tes Americhis, cirche 15 milenis indaûr; il leon marsupiâl Thylacoleo carnifex, e tancj altris animâi grandonons, in Australie, cirche 50 milenis indaûr; i Neanderthal, in Eurasie, cirche 30 milenis indaûr (Claudio Tuniz, Evoluzion umane: la sience e mostre i segrets des nestris origjins)
Sin. moment
, timp
, dade
, dade di timp