Dizionari de Lenghe Furlane

cuart  /-à-/  cuart  [FO]

1. adi.num., pron.num. che intune serie al è tal puest numar cuatri:  o fâs il cuart an di universitât e mi àn metude a fâ scuele tune prime tal puest dulà che e mancje la titulâr (Pieri Piçul, Vieri e gnûf); il cuart comandament, il prin di chei che a rivuardin l'om dopo dai prins trê che a rivuardin Diu, al dîs di onorâ il pari e la mari (Antoni Beline, La eterne lote dai furlans); i fîs dai rês cu la mame a fevelavin une lenghe, cu lis camarelis une altre, cul precetôr la tierce, cul predi la cuarte e vie indenant (Franc Fari, Il cjâf dai furlans)
   
   1. dopo dal non di un pape o di un regnant, pal solit scrit in numars romans:  Marquart di Randeck al jere cressût tai pastiçs de politiche ingredeose di Luduì di Baviere e di Carli IV di Lussemburc (Josef Marchet, Cuintristorie dal Friûl fin sot la Italie)
   2. par segnâ i agns o i secui in relazion al an convenzionâl de nassite di Crist o a un altri tiermin:  la lenghe «rustiche» che e fevelave la biade int dai cjamps, e che Sant Jeroni al ricuarde za tal cuart secul, e je cence altri il segn plui clâr di cheste individualitât (Gian Carlo Menis, Storie dal popul furlan)
   3. ancje in locuzions cun ordenâi di ordin superiôr:  al jere il minût cuarantesim cuart dal prin timp di une partide di balon, che in ogni câs si scugnive dîle impuartante (Agnul di Spere, Usgnot partide di balon)
   4. in espressions che a segnin une persone gjeneriche:  une fantate che i plâs fevelâ cul tierç e cul cuart (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
2. s.m. ognidune des cuatri parts compagnis di un intîr:  un cuart di une piece di formadi; tal 1817, cognossût come l'an de fam, trê cuarts dai fruts dai puars, a murivin sot i sîs agns (Alan Brusini, Come tai romançs); la popolazion furlane e cale di bot tal ultin cuart dal 1500 (Adrian Cescje, Liniis di storie sociâl e economiche dal Friûl 1500 - 1800)
   Sin. cuarte part
3. s.m. ognidune des cuatri fasis dal cicli lunâr e dade di timp che i corispuint:  o dovarès predî timp biel chest cuart / esaminant la lune par difûr, / ma, strolic di mistîr, mi soi nacuart, / che il malan al è dentri par sigûr (Pieri Çorut, Il Strolic furlan par l'an 1824)
   Sin. cuart di lune
4. s.m. cuarte part di une misure, spec. dal litri di vin:  puartimi un altri cuart di neri, va! (Gianfranco Pellegrini, Sium de Vilie dai Sants); par taponâ il bûs dal stomi, di corse te ostarie a bevi un cuart (Angelo Covazzi, Il miarli)
   Sin. cuartin , cuartut
5. s.m. ognidune des cuatri parts che e ven taiade une bestie maçade:  [lis puartadoris di Timau] cu la cjame scuignivin encje poussâ cualchi volte, massime a di chês che ur tocjave la cjarn a la vevin pesant… un cuart di manç… lavin as vot, vot e mieze e vignivin a cjase a miesdì (Celestino Vezzi, Bruno Craighero, «Chê âte guere… la guere da int»)
6. s.m. te indicazion de ore, dade di timp di cuindis minûts:  al veve calcolât di rivà sul puest tor nûf e in fat, a nûf mancul un cuart, al passave dongje de cjase di Italico (Roberto Ongaro, Il muc); o jentrai tal ufici dal archivist che al mancjave un cuart a lis cinc, la ore de sierade (Gianluca Franco, Il solt di Arlunc)
7. s.m. persone che e mancje par completâ lis cubiis di un partide a cjartis:  lu invidarin a fâ il cuart a scovon (Carlo Sgorlon, Prime di sere)
8. s.m. [CO, TS] sport viôt cuart di finâl
9. s.m. [TS] cjalç. part in bande e daûr de scarpe
   Cfr. suele , tomere , vuardul , tac¹ , ribot , pontât
10. s.m. [TS] sart. part alte de schene di un vistît di om:  i cuarts de velade (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• a cuarts loc.av., loc.adi.inv.
• cuart di lune loc.s.f., loc.s.m.
• cuart di ore loc.s.m.
• jessi li li loc.v.
• jessi su lis trê e trê cuarts loc.v.
• jessi su lis undis e trê cuarts loc.v.
• jessi sui trê e trê cuarts loc.v.