Dizionari de Lenghe Furlane

cope¹  /-ò-/  co|pe  [CO]

1. s.f. recipient ingjavât, semisferic, pal solit larc e pôc font, che si pues cjapâ cun une o dôs mans, par bevi o par mangjâ:  o fasìn trusse cu lis cjicaris tant che se a fossin copis di spumant (Alan Brusini, Gian Paolo Linda, I forescj)
   Cfr. tace , scudiele , speche
   
   1. cuantitât di robe tignude in chel recipient
2. s.f. premi, in gjenar in forme di recipient, ispirât in origjin ai premis dâts te Grecie antighe, dât al vincidôr di une competizion:  a la fin e jere la premiazion cun tant di copis (Checo Tam, Montecariol)
   
   1. la competizion stesse, ancje cun iniz. maiusc. in denominazions uficiâls:  inamorât di Sacchi, al ritignì la finâl de Cope Intercontinentâl cuintri il Nacional Medellin e la finâl di Cope dai Campions cuintri il Benfica il paradigme dal gnûf zûc (Stiefin Morat, Adalt abàs)
3. s.f. zûcs un dai cuatri pâi des cjartis di briscule:  [….] « Ben, scomencìn. … / Sîs e trê nûf …» «Un cuatri.» « Dal moment!» / «Un fant di cope.» « Ciò, Filip, sta atent, / […] (Pieri Bonin, Scarabocj)
4. s.f. ognidune des dôs parts ingjavadis dal rezipet

Polirematichis e espressions idiomatichis

• bati il fant di cope loc.v.
• cjapâ il trê di cope loc.v.
• cjoli il trê di cope loc.v.
• nancje pal as di cope loc.av., loc.inter.