Dizionari de Lenghe Furlane

contribût  con|tri|bût  [FO]

1. s.m. jutori dât di bande di cdn. pal ben di ducj:  o speri di vê rivât a dâ un piçul contribût pe valorizazion de nestre art (Erika Adami, O ai scrit pal gno popul)
   Sin. contribuzion , jutori , sussidi
   
   1. sume di bêçs che e covente par une spese comune:  meti un contribût par un regâl; come che a fasaran altris radios "di moviment' in Italie cualchi an dopo, Onde Furlane e frontà la cuistion in maniere pratiche, domandant aes personis che a crodevin te sô mission di dâ un piçul contribût anuâl (Max Mauro, Un Friûl difarent: i 90 mhz di Onde Furlane)
      Sin. contribuzion , cuote , part¹
2. s.m. sume di bêçs paiade a un ent public pal so funzionament o par servizis di interès comun:  i patriarcjis, ancjemò tal XI secul, a varan tacât a clamâ dongje i lôr feudataris, ogni volte che al jere par aiar alc di grues, par sintî la lôr opinion e par intindisi sul cont de «taie» feudâl (che al ven a jessi sul numar dai soldâts e dai cjavai che a podevin mandâ tal esercit patriarcjâl) e su la division dai contribûts in monede (Josef Marchet, Cuintristorie dal Friûl fin sot la Italie)
   Sin. tasse² , impueste¹ , tribût
3. s.m. sume di bêçs paiade, part dal datôr di lavôr, part dal lavoratôr, pe previdence sociâl:  mi domandin cui che al fâs fâ chescj lavôrs te glesie, dulà che o ai cjolt il materiâl, dulà che o ai la licence di costruî, cemût che o ai cjatâts i lavorents, ce paie che ur doi, se o ai paiadis lis sigurazions e i contribûts (Josef Marchet, Lis predicjis dal muini)
   Sin. contribût previdenziâl
4. s.m. jutori finanziari dât di ents publics a personis, comunitâts, istituzions e v.i. che a vedin bisugne, par fâ une ativitât che e ven calcolade di interès gjenerâl:  za fa doi agns o trê, i contadins a àn tirât miliarts di contribûts par comprâ vacjis di lat e manzis plenis (Riedo Pup, Ocjo di no pintîsi); daûr de leç, ogni Provincie e à di istituî une Comission pal control des domandis di contribût des sociis dal teritori (Adrian Cescje, Memoriis di politiche linguistiche)
   Sin. jutori , finanziament , sussidi
5. s.m. pês, influence parziâl intun fenomen o intun contest gjenerâl:  tra lis regjons di partence il contribût plui grant [te emigrazion] al è rivât, daûr dal ordin, dal Abruç, dal Venit, de Pulie e de Sicilie (Francesco Micelli, La emigrazion dal Friûl - Vignesie Julie te Belgjiche)
6. s.m. ricercje, document, publicazion e v.i. che e jude a slargjâ lis cognossincis intun ciert setôr:  un contribût di Roberto Iacovissi dedicât a Giorgio Faggin e aes sôs traduzions par furlan di impuartantis oparis tiradis fûr des leteraturis forestis (Erika Adami, Un voli su la culture furlane)