Dizionari de Lenghe Furlane

zirâ ator    [AF]

1. loc.v. lâ o passâ dongje o a une cierte distance di alc, cuntun moviment plui o mancul circolâr o cuntun mudament di direzion:  al scoltà dutis lis trasmissions de radio sore l'imprest [il satelit] che al zirave ator de tiere sbassantsi (Agnul di Spere, La pôre di Fidrì Job); al ero jessjût da devôr il banc zirantji ator (Fulvio ReddKaa Romanin, Geologicamente impossibile)
   Sin. zirâ intor
   
   1. movisi plui o mancul dongje e cence une direzion precise o coerente:  l'avon al scomence a lâ sù e jù pa glesie, al bat di ca e di là pai mûrs, al zire ator, pai cjantons: ma nol mostre nissune voie di fermâsi (Luigi Gortani, Il Deu di Cjargne)
2. loc.v. vê une forme o une disposizion che e cjape alc tal mieç e lu contorne:  al le a sentâsi sul murut che al zirave ator de glesie (Agnul di Spere, Istât)
   Sin. cenglâ , cercenâ , cori tor ator , lâ tor ator , passâ tor ator , zirâ ator ator , zirâ intor
3. loc.v. cirî di cjapâ contat cun cdn., di otignî alc, di morosâ e v.i.:  "Ma ce crodistu? Che jê ti spieti propit te par fâsi palpâ lis tetis? A 'nd à tancj che a i zirin ator!" (Carlo Tolazzi, La salamandrie tal fûc)
   Sin. zirâ intor
4. loc.v. jessi atîf intun ciert ambient, vê part intune cierte ativitât:  "[…] nol jere un sisteme ideologjic, al jere un orientament viert, dinamic, dialetic". Lis peraulis di Rossi a cjatin conferme tal numar e te varietât di colaboradôrs che a zirin ator de radio juste un an dopo de sô nassite (Max Mauro, Un Friûl difarent: i 90 mhz di Onde Furlane)
   Sin. zirâ intor
5. loc.v. vê alc tant che argoment principâl, tant che pont centrâl:  dut il dibatit politic al zire ator a un sôl teme (Walter Tomada, E cumò ce sucedial?)
   Sin. zirâ intor
6. loc.v. frontâ alc in maniere indirete o pierdi timp prime di frontâlu:  no stâ a zirâ tant ator de cuistion e dîs ce che tu vuelis
   Sin. zirâ intor

Components:

• ator av., prep., adi.inv.
• zirâ v.tr., v.intr.