Dizionari de Lenghe Furlane

vistît²  vis|tît  [FO]

1. p.pass., adi. viôt vistî , viôt vistîsi
   Var. vistût , vestît² , viestît² , viestût
2. adi. che al à i vistîts intor:  "Compre un doi tocs, cun chel costum li no tu cjapis nancje soreli, tu sês dute vistide" (Mario Beltramini, Jo e Graziella); Vigjut si butà jù vistît te sô brande di stranc e si indurmidì come un len (Pieri Menis, Tal bosc di Kebespok)
3. adi. che al à intor une cierte sorte di vistiari, daûr dal gust, de mode, de ocasion e v.i.:  biele vile, tante robe, femenute fine e ben vistide che e sa cemût ricevi i amîs impuartants, chei che dopo ti tornaran cont (Antescûr, Alc si è rot); la spagnole e veve fat murî tancj di lôr, e la int e jere pal plui vistide di neri (Maria Forte, Dome la cjampanute di Sant Bortul)
4. adi. (fig.) cuviert di alc:  al veve scugnût partî pes Gjermaniis a lavorâ te fornâs, tune valade strete, dute vistide di boscs di pins (Pieri Menis, Sul agâr); una grant stansia vistida di rosi e di vert (Novella Cantarutti, La scuela da li rosi)
   
   1. metût intune cierte forme, cambiât di aspiet:  cui che al dopre il metodi "a la zingare" par imparâ lis lenghis, al fevele la sô marilenghe vistide di une altre lenghe (Franc Fari, Il cjâf dai furlans)