Dizionari de Lenghe Furlane

vistî  vis|tî  [FO]

1. v.tr. cuvierzi cun vistîts:  [il fi] al viôt di jê [malade], le vistìs e disvistìs co e jeve a buinoris o e va a pognisi intal jet la sere (Ivano Urli, Storie di Min)
   Var. viestî , viesti , vestî
   
   1. meti i vistîts, pal solit biei, intor di un muart pôc prime dal funerâl:  dôs feminis di glesie a vevin vistude la muarte, taponât il spieli dal armâr cuntun suieman blanc, e metût il bussul da la aghe sante cul ramut di ulîf insom da la cocjete (Franca Mainardis, Il sium di Lissandri); e sopuartà simpri cun pazience chel temperament bilôs e fastidiôs [di sô madone] che al cresseve cul cressi dal mâl, fin che le à vistude e metude te casse (Pieri Somede dai Marcs, A jerin lagrimis)
   2. proviodi i vistîts che a coventin:  no stait a pinsirâsi che jo le vistìs, i fâs la dote che i fasarà fâ une figure di chês (Roberto Ongaro, Cretevierte); nol à dibisugne di gjavâsi il pan di bocje ni il vin dal gargat, par vistî il so frut (Josef Marchet, Lis predicjis dal muini)
      Sin. aparâ , montâ
2. v.tr. meti intor o vê intor:  o vevi a pene finît di vistî il pigjame, che o sintivi un gratâ te puarte come che al fâs un gjat par uçâ lis ongulis (Alan Brusini, Gian Paolo Linda, I forescj); a vistivin des bielis tutis neris cun dai dissens in rilêf (Checo Tam, Sense); ducj i zovins a vistirin chê monture che ju puartave tes trinceis (Maria Forte, Cjase di Dalban)
3. v.tr. ornâ cdn. o alc cun paraments:  tu fasarâs il plasê di viodi tu, Spinut, di sunâ, di vistî il predi e di rispuindi messe (Josef Marchet, Lis predicjis dal muini); La setemane prin de tierce di Setembar, al jere un privileç di cjase mê, ma grant privileç, chel di vistî a sôs spesis la Madone (Pieri Somede dai Marcs, La Madone dai siet dolôrs)
   Sin. aparâ , furnî , ornâ
4. v.tr. (fig.) cuvierzi cun alc:  l'Invier al veve vistût di fumate dute la planure (Franca Mainardis, La liende dal riûl); i Batistons a vistirin di vîts, di forments, di blavis, di vert e di vite dut il roncat salvadi e pustot (Dino Virgili, La aghe da pît la cleve)
   Sin. cuvierzi
   
   1. fâ cjapâ un ciert aspiet, meti intune cierte forme:  il disc al presente nûf composizions che a vistissin di musiche ancjetantis poesiis di Federico Tavan (Erika Adami, Suns Europe al impie il Friûl)
5. v.intr. puartâ intor vistîts di une cierte fate:  il fat al sucêt tun cjistiel o palaç des culinis de Furlanie, se pussibil lis personis [i atôrs] a vistissin in costum, dai timps passâts (Pieri Somede dai Marcs, Mame…)
   Sin. vistîsi
6. s.m.sing. vistiari:  materiis primis par fâ tiessût pal vistî e altris ûs (Adrian Cescje, Liniis di storie sociâl e economiche dal Friûl 1500 - 1800)
   Sin. vistiari
   Cfr. vistît¹
   
   1. maniere, gust di sielzi ce che si met intor, e ce che si à intor daûr di une cierte sielte:  Molâr al veve simpri vût gust di curâsi i botons, ma cumò il so vistî al ere propit perfet (Stiefin Morat, Kebar krossè); di Trivignan ancje chês: lis cognòs tal vistî. A Trivignan a van dutis a ûs di siore (Catarine Percude, La plui biele)

Proverbis:

• mangjâ a mût so e vistî a gust gno
• mangje a mût to e vistìs a mût dai altris
• se e je ben vistude, ancje une colone a pâr une done
• se e je ben vistude, ancje une colone a pâr une matrone
• se si vistìs un jubâl al pâr un gardenâl
• se si vistìs un pâl, al pâr un gardenâl
• se si vistìs une colone, e pâr une done
• se si vistìs une fassine, e pâr une regjine
• se si vistìs une jone e pâr une done,
• vistî a mût di chei altris, mangjâ a mût so
• vistìs une fassine, e somee une regjine; vistìs un pâl, al somee un gardenâl