taramot
/-òt/
ta|ra|mot
[FO]
-
s.m.
scjassade dal teren, cun vibrazions ancje violentis, causade dal moviment sot tiere di massis di cret, a nivel plui o mancul profont:
ducj i reatôrs di Fukushima a son costruîts sul cret e progjetâts par resisti ai taramots previodûts su base storiche (Alessandro Pascolini, Il disastri de centrâl nucleâr di Fukushima Dai-ichi);
a cause di taramots e di assestaments gjeologjics, si sierà la risultive che e menave sù di sot tiere la aghe (Adrian Cescje, Viaç aes origjins dal Logos)
Sin. sisme
Var. teremot
-
(par anton.)
il complès di events sismics dal 1976:
[il Friûl] cul taramot al veve tornât a scuvierzi la sô dimension di popul, cuntune lenghe origjinâl (Max Mauro, Un Friûl difarent: i 90 mhz di Onde Furlane);
al è pôc che [a Rome] a son vignûts a savê che al esist il Friûl: par vie dal taramot, si po dî (Riedo Pup, In Friûl cul passepuart)
-
s.m.
(fig.)
fat subitani e no spietât che al mude di plante fûr une situazion, al savolte un ecuilibri e v.i.:
"Cîr di capînus almancul tu. […] O varìn bielzà un bon ce fâ a scombati cun nestre mari. Tu puedis imagjinâti il taramot che al sarà in cjase" (Gianni Gregoricchio, Trê feminis);
Rome no sint i sbisiaments, e sint il sunsûr, il taramot, il burlaç (Josef Marchet, La ore decisive);
al cirive soredut di bonâsi, par no pandi a Odile e a sô agne il taramot che al veve dentri (Franca Mainardis, Il sium di Lissandri)
-
s.m.
(fig.)
persone une vore malcuiete, che e fâs dams e savoltaments:
"Ma no i aial ancje un fi plui piçul?" "Sì, ma chel al va ancjemò inte scuele piçule, […] e a disin che ancje chel al è un taramot […]" (Bepi Zampar, Cjacaris e strambolots dai nonos in spiete di cjapâ la pension)
Sin. bilite
, cjaval sbrenât
, diambar
, diaul
, peste1
, sbilf
, spirfolet