Dizionari de Lenghe Furlane

subiet  /-èt/  su|biet  [FO]

1. s.m. argoment, cuistion di une discussion, conversazion, riflession e v.i. o teme di une vore artistiche o leterarie:  l'ultin articul dal libri al tocje un subiet che fin cualchi an indaûr nol varès cjatât puest intun libri di cheste fate (Laurin Zuan Nardin, La enciclopedie di Buri)
   Sin. argoment , teme²
   Var. sogjet
   
   1. persone che e comparìs tune rapresentazion, tune narazion, tune discussion e v.i.:  tancj lavôrs a puartin il non dal subiet de opare in cuistion intant che il so autôr al è scognossût (Fabian Ros, La art e lis sôs funzions)
2. s.m. individui o complès di individuis o ancje istituzion che a fasin une cierte azion:  Progetto FVG, un gnûf subiet politic creât dal imprenditôr Sergio Bini (Roberto Pensa, Sfide a poker sul futûr dal Friûl-Vignesie Julie)
3. s.m. [TS] med., sient. individui in cure o sot indagjin cliniche o cjapât in esam intune ricercje:  lis ricercjis [...] a son limitadis a studis di câs patologjics di personis cun disturps specifics dal lengaç [...]. No son mai stâts cjapâts in considerazion, invezit, subiets normâi (Federica Mauro, Alessandra Burelli, Valutazion dal disvilup lenghistic in fruts bilengâi furlan-talian)
4. s.m. [TS] ling., gram. peraule o secuence di peraulis che a denotin cui o ce che al fâs la azion esprimude dal verp:  il pronon indefinît ducj al pues jessi subiet di un verp tal singolâr (Sandri Carrozzo, Repertori di regulis pal nivel C)
5. adi., s.m. che, cui che al sta sot dal domini, de autoritât o dai efiets di cdn. o di alc:  ognidun che al vedi invistiments tal forest al è subiet di cualchi an incà a une schirie di adempiments leâts ae declarazion dai redits e ae tassazion dal invistiment (Mariannina Rocco, Invistiments forescj e declarazion dai redits)
   
   1. adi. che al à la pussibilitât o la inevitabilitât di patî un fat, un efiet, une cundizion:  il profîl ipotetic di un abitant subiet a esclusion sociâl: anzian, pôc istruît, che al vîf intune piçule citât di bessôl (Tjaša Gruden, Puaretât in Slovenie confrontade cun la Europe. La crisi e somee passade, ma i problemis a restin)