Dizionari de Lenghe Furlane

stâ dongje    [AF]

1. loc.v. jessi a pocje distance o tacât:  e fevelave legre cuntune amie che i steve dongje (Alan Brusini, Gian Paolo Linda, I forescj); al à tacât a cjapâ sù i prins lavôrs par so cont, soredut intes feroviis e tes costruzions che a stevin dongje (Raffaele Serafini, Contis sot spirt)
2. loc.v. jessi e restâ tal stes lûc, te stesse cundizion, in compagnie e v.i.:  dentri il Partît a jerin ancje altris animis che a stavin dongje pal ben comun dai proletariis, ancje i sindicaliscj anarchics a lavin adun cul Partît, almancul fin a chel moment (Max Mauro, Felix Marchi e il sium dal furlan-furlan); «Jo e Pierluigi - al conte [Paolo Medeossi] - si jerin cognossûts pôc timp prin ma pal plasê di stâ dongje un cul altri o vin metût in pîts cheste esperience torzeone che e à fat plui di 50 spetacui tai cinc agns che e je stade in vore» (Walter Tomada, La scomesse dai Cercaluna)
   Sin. stâ insiemi , stâ adun
   
   1. jessi leâts di une relazion sentimentâl o di convivence o di colaborazion di mût di passâ timp insiemi:  "Podês crodi se jo mi podarai usâ a stâ dongje di un babeo di frutat di chê fate" (Costantino Smaniotto, Co l'amôr al cimie)
3. loc.v. jessi presint e judâ, fâ sintî solidarietât, partecipazion emotive, afiet e v.i.:  si inacuarzeve de sô cruzie, la Nene, ma no cjatave mieç di capîle. «Ce isal capitât di tant penç po a chê biade Ulive?» si domandave, e i stave dongje plui di mai (Maria Forte, La tiere di Lansing); i miei gjenitôrs mi son simpri stâts dongje e mi àn insegnât tantis robis (AAVV, Sul florî)
4. loc.v. formâ e mantignî une struture, une funzionalitât o ancje une armonie:  si scuen ricognossi che il Friûl e Triest son dôs realtâts diviersis. Puedino stâ dongje? (Dree Valcic, Se FVG al devente un dogme che nus puarte ducj al martueri); no sai trop che cheste premetidure e sta dongje di chel che o ai scrit tai cjapitui precedents, ma un sens al è
   Sin. stâ adun
   Cfr. tacâ

Components:

• dongje av., prep., adi.inv.
• stâ v.intr.