Dizionari de Lenghe Furlane

sclipignâ  scli|pi|gnâ  [CO]

1. v.tr. bagnâ o sporcjâ cun gotis:  ancje chês altris si viodeve che a jerin contentis, a cjacaravin a fuart e a ridevin se par câs la aghe lis sclipignave (Jolanda Mazzon, Di là de rêt); tirade vie dal fûc, la cuince [di fricis] e va sclipignade cul asêt e butade sul lidric (Zuan Nazzi Matalon, Giancarlo Ricci, Il miôr de cusine furlane)
   Cfr. sborfâ , scliçâ
   
   1. (ancje ass.) fâ colâ o saltâ ator gotis:  al ploveve un dopogustât, cun dadis a sglavinâ, di sclipignâ lis gotis cuintri i veris de vitrine [de buteghe] (Eugjeni Marcuç, Liende a Sant Zuan); e jere colade jù, spanzant e sclipignant dapardut (Raffaele Serafini, La balene)
   2. fâ vignî fûr, saltâ o sbalçâ ator ancje elements piçui no licuits:  un impast infogât e ferbint, che al sclipigne faliscjis e al traspire vapôrs (Bepi Agostinis, Storie de art in Friûl)
   3. (fig.) fâ vignî fûr cun vivôr ancje di alc di imateriâl:  une voie di viodi int come voaltris che e sclipigne ligrie di ogni bande (Pieri Piçul, Vieri e gnûf)
2. v.intr. di gote o licuit, saltâ o sbalçâ ator:  i claps a corin jù saltant fin ta la aghe, e po un plomp: la aghe e sclipignà, si savoltà, si inturbidì (Dino Virgili, La aghe da pît la cleve); "Tiraitsi in bande mo fruts, no viodeiso che [il zuf] al sclipigne pardut. Volêso scotâsi?" (Lucia Scoziero, Zuf e canaie)
   
   1. ancje di altri element piçul ma no licuit, saltâ o sbalçâ ator
   2. (fig.) ancje di alc di imateriâl, vignî fûr cun vivôr
3. v.intr. movisi ta la aghe o in câs tun altri licuit:  piduts che sclipignin / ta la aghe (Francesca Marini Barnaba, Barlums)
   Sin. svuatarâ , svuacarâ , slapagnâ , sbaciâ , tafagnâ
4. v.tr. (coloc.) bevi vin o un altri alcolic:  Mario, ta la ostarie di Miculan, a Tresesin, al leieve il gjornâl sclipignant un taiut (Meni Ucel, Mingulis - Il Strolic furlan pal 1982)