Dizionari de Lenghe Furlane

rodul  /rò-/  ro|dul  [CO]

1. s.m. struture formade di un materiâl involuçât o fat sù in mût di vê une forme cilindriche:  Stiefin al jentrave tal coridôr cun in man un rodul di cjarte di pacs e un glemuçs di spali (Mario De Apollonia, Il timp par ledrôs); un rodul di fîl spinât (Alan Brusini, Come tai romançs); cualchi rodul di cjarta igjienica (Bruno Razza, La vigna dal Berto)
2. s.m. document di cjarte, pergamene, papîr, sede o altre membrane in forme di lunc retangul che al ven fat sù:  a vignivin clamâts sù i premiâts a cjapâ des mans dal vescul il rodul de menzion onorevul (Antoni Beline, La fabriche dai predis)
   
   1. regjistri medievâl ancje in forme di codiç di pagjinis leadis e no di une sole lungje pagjine fate sù:  tal archivi dai conts Turians, regalât za cualchi an a la Biblioteche Comunâl di Udin, al è, fra lis tantis cjossis di interès un regjistri o rodul, che al va dal 1469 al 1486 (Josef Marchet, Il marcjât de Blancje)
3. s.m. (fig.) categorie, cuantitât di elements, robis o personis che a àn un o plui caratars in comun:  e pûr doman mi tocje / di cori a Cividât / dal siôr agjent des tassis / che al «fische» i capelans / e si complâs di metiju / tal rodul dei pes cjans (Zaneto, Ladric: sperance uniche)
4. s.m. pastôr che al mene ator lis bestiis sôs e di altris parons in rodul, vâl a dî dantsi la volte cun chei altris:  Zuanut, cuant che il rodul al passà davant dal so cjôt, al molà fûr la cjare (Luigi Gortani, Sant Pieri e la code da vacje)
   
   1. trop di bestiis di plui parons puartât a passon volte par volte di un dai parons:  doman nus tocjarà a noaltris di lâ a passon cul rodul (Luigi Gortani, Sant Pieri e la code da vacje); a van ator pas monts da Cjargne come las cjares fûr di rodul (Pietro Cella, Las ombres da vuere)
5. s.m. [CO, TS] artes. aste o breute drete che e covente par splanâ e gjavâ materiâl che al da insù rispiet a un ciert nivel
   Sin. staze , rassadôr
   
   1. imprest par messedâ la farine de polente cuant che si bute te aghe di maniere che no si fasin grops, otignût pal solit di une cime di peç
      Cfr. mescul
6. s.m. protezion pal cjâf dai fruts che a tachin a cjaminâ:  cuant che a movevin i prins pas, la mari si premurave di preparâ il cruc, o rodul (Amelia Artico, Zûcs da mularie di un viaç)
   Sin. parecrups , cruc² , colaç , parecrucs

Polirematichis e espressions idiomatichis

• a rodul loc.av., loc.adi.inv.
• lâ a rodul loc.v.