Dizionari de Lenghe Furlane

pene²  /pè-/  pe|ne  [FO]

1. s.f. [BF] ogni element dal implum dai uciei, che ur covente ancje par svolâ:  veve in cjâf par pontarûl / une pene di dindiat (Ermes di Colorêt, II, 157)
   Sin. plume
2. s.f. imprest par scrivi fat une volte cuntune plume di ocje spiçade e dopo di une canucje cul penin:  si figurave il pape tal so ufici, sentât su la sô poltrone dorade e il scabel sot i pîts, jenfri i gardenâi vistûts a ros e il segretari che al scriveve cu la sô pene di ocje (Alan Brusini, Par stradis lungjis); prime di jevâ in pîts al met adun ogni robe daûr di un ordin che al à di jessi usuâl: la pene, aromai secje dal ingjustri, in bande dal librut (Franco Marchetta, Madalene)
   Sin. penâl³ ipon.
   Cfr. tai , sclap , cane
   
   1. cualsisei imprest doprât par scrivi a man cul ingjustri:  al cjapà sù la pene e al copià la direzion suntun sfueut che al de a Agnese (Roberto Ongaro, Il muc)
3. s.f. (fig.) capacitât, azion, ativitât di scrivi, ancje caraterizade di une cierte maniere, di un ciert stîl e v.i.:  brave int, che e sta a cjalâ, magari a criticâ, ma che no da une man, che no mole une sburtade ni cu la lenghe, ni cu la pene, ni cui carantans (Josef Marchet, Legnadis e pidadis); une piture comovente di une des partencis e rive de pene dal scritôr triestin Giani Stuparich, intun articul dal "Corriere di Trieste" dal Avost dal 1955 (Francesco Fait, La emigrazion in Australie dal Friûl - Vignesie Julie); in materiis di onôr no vês grant vene / siôr Cont, parcè che il vuestri prin mistîr / fo di menâ la sgaile, e no la pene (Ermes di Colorêt, I, 95)
   Sin. penâl²
   
   1. cui che al scrîf, spec. in relazion ae sô abilitât tal scrivi:  a part ce che al dîs, al è une buine pene, al scrîf ben (Adrian Cescje, Memoriis di politiche linguistiche)
      Sin. scritôr
4. s.f. gjenar di paste alimentâr curte, slisse o riade, simile a un canel taiât di traviers:  un plat di penis cul ragù
5. s.f. [TS] artes. sorte di martiel cuadri, cun mani curt, par bati il fonts des cjalderiis
   
   1. estremitât plache di un fier lunc:  la pene dal pâl di fier (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• sbrissâ la pene loc.
• tignî in man la pene loc.v.
• tignî la pene in man loc.v.

Proverbis:

• il siôr cuntune menade di pene al guste e al cene
• pene e puarte pene
• un siôr cuntune menade di pene al guste e al cene