ostarie
/-ì-/
os|ta|ri|e
[FO]
-
s.f.
ambient public li che si va a bevi, plui di dut vin, e cualchi volte ancje a stuzigâ o a mangjâ robe semplice:
al le in ostarie a bevi un tai e a viodi a zuiâ di balis tal curtîl, poiât a un grant morâr (Carlo Sgorlon, Prime di sere);
la domenie no jere nancje fieste cence Messe in glesie e il tai e la partide cui amîs ta la ostarie (Riedo Pup, I furlans e la ostarie);
no jere plui une ostarie, ma l'odôr muf des breis dal paviment e des taulis bagnadis mil voltis di vin strucjât e lavadis cent voltis dibant al restave chel. (Spirt Anonim, Braùre)
Cfr. stalo
, locande
, enoteche
, bar2
, zarde
, frascje
, betule
, birarie
-
inter.
(coloc., eufem.)
esclamazion doprade invezit di "ostie", par no jessi blasfems o par doprâ une espression mancul fuarte di maravee, rabie, amirazion e v.i.:
"Ostarie, ma no ocoreve disturbâsi" (Pieri Somede dai Marcs, L'avocat e la luianie)
Sin. ustinon
, usti
, osti
, ostie
, ostissie
, ostiment
, ostinon
Proverbis:
- a la ostarie si fâs il cont prin di lâ vie
- cuant che l'ostîr al è su la puarte, nol è nissun ta la ostarie
- cui che al à bon vin in cjase nol va ta la ostarie
- cui che nol vûl vê ostarie che al buti jù la frascje
- cui che nol vûl vê ostarie che al dispicji la frascje
- in ostarie o mangjâ o bevi o fâ la spie
- lis disgraciis a stan simpri prontis tant che lis taulis in ostarie
- no bisugne fermâsi a ogni ostarie
- no cjar di becjarie, no fantate di ostarie
- purcit di mulinâr, cjan di becjâr, fantate di ostarie no convegnin ogni massarie