Dizionari de Lenghe Furlane

memorie  /-ò-/  me|mo|ri|e  [FO]

1. s.f. [FO, TS] neurol., psic., biol. facoltât de ment di tignî, tornâ a tirâ fûr e doprâ informazions di esperiencis passadis, capacitât di visâsi:  e veve la memorie frescje come une frute, e si visave di dut chel che e veve studiât (Carlo Sgorlon, Il dolfin); lis formulis a son elements che a tornin simpri compagns dilunc dal poeme […]. La lôr funzion e jere chê di judâ la memorie di cui che al recitave e di cui che al scoltave (Sandri Carrozzo, Pierluigi Visintin, Jentrade de Odissee); chest paîs di ex emigrants cence memorie, plen di pôre e di int che a no rive plui a capî se a 'nd è ancjemò un tic di umanitât inte vite che e sta fasint (Maurizio Mattiuzza, La maiute di Zidane); i corvats, oltri a vê une memorie spaziâl une vore disvilupade, a somein presentâ il fenomen dal autoricognossiment al test dal spieli (Franc Fari, La evoluzion dal çurviel e de cussience tai vertebrâts)
   Var. marmorie
2. s.f. complès di dut ce che al ven ricuardât:  te mê memorie e te memorie di ducj chei che lu àn cognossût intal […] Moviment Friûl, Fausto Schiavi al à lassade une olme che no si è mai sfantade e, fin che al sarà vîf cualchidun di noaltris, no si sfantarà mai (Adrian Cescje, Tal non di Fausto Schiavi)
   
   1. singul fat che al ven ricuardât:  Lissandri al jere comot, ve une altre memorie che e tornave, che i jemplave il cûr (Franca Mainardis, Il sium di Lissandri); tu saressis duncje l'unic tra di nô che al podarès compagnâ cheste zoventût tal zîr che àn di fâ pal convent, l'unic che al podarès fâ in mût che cheste visite ur lassi une buine memorie (Zuan Lurinçon, La Madalene)
      Sin. ricuart
   2. ricuart, reputazion, dovê di ricognossince par une persone che no je plui:  jo o viodevi di jê pe memorie di chel puar so fi, che mi veve lassade vedue tant adore (Maria Forte, Dome la cjampanute di Sant Bortul); int che e dismentee e che e ofint la memorie dai muarts (Riedo Pup, Rispueste: cjalâ e tasê)
3. s.f. note che e covente par visâ o par visâsi di alc:  presentâ memoriis scritis e documents pertinents al ogjet dal procediment (Aministrazion Publiche, Statût dal Comun di Udin)
   Sin. apont² , note , pro memoria
4. s.f. robe o document o ancje element no materiâl che al testemonee il passât o che al permet di ricuardâsi di alc:  si puedin viodi lis testemoneancis di cheste grandece tal Museu di Cividât, che al à la plui largje e innomenade racolte di memoriis e relicuiis langobardis (Josef Marchet, Cuintristorie dal Friûl fin sot la Italie); Puaris santis memoriis de nestre storie! [in riferiment ai monuments di Aquilee no preseâts dai visitadôrs] (Pieri Somede dai Marcs, A Aquilee)
5. s.f. tal pl., scrit autobiografic là che l'autôr al fâs memorie di fats che al à vivût:  la impuartance documentarie dai Comentaris [di Cavedalis] e ven confermade dal confront cun memoriis, diaris e testemoneancis di altris protagoniscj di chei avigniments e cu lis cjartis di archivi (Giovanni Pillinini, Zuan Batiste Cavedalis - Une vite esemplâr); in chestis Memoriis o ripuarti bocons di diari e di riflessions che tai agns o vevi metudis jù, massime in ocasion di events che o sintivi impuartants (Adrian Cescje, Memoriis di politiche linguistiche)
   Sin. autobiografie , ricuart
6. s.f. [TS] inform. unitât di un sisteme di elaborazion che e covente par tignî e conservâ dâts:  se la incressite e continue cussì, la memorie dai services (stazions cjamadis di memorie colegadis jenfri di lôr, ndr) no bastarà e il sisteme al riscje il colàs (Dree Venier, Stiefin Taboghe, Si visaiso di «Second life»?)

Polirematichis e espressions idiomatichis

• a mê memorie loc.av.
• a memorie loc.av.
• fâ memorie loc.v.
• savê a memorie loc.v.

Proverbis:

• il bausâr al scuen vê buine memorie