Dizionari de Lenghe Furlane

justizie  /-tì-/  jus|ti|zi|e / jus|ti|zie  [FO]

1. s.f. jessi just, imparziâl:  la caritât no je la justizie e no po sostituîle. La caritât e je libare e magari ancje arbitrarie […]. La justizie no po jessi ni arbitrarie ni libare, e scuen cjalâ nome il dirit (Josef Marchet, Cirî la caritât)
   Sin. misure , obietivitât , imparzialitât , onestât
2. s.f. valôr etic dal ricognossi e dal rispietâ i dirits di ognidun, valutant i siei merits e lis sôs colpis:  cuant che un al ven tocjât sul so, al piert dut il sens de justizie e dal dirit dal prossim, che a son, in timp di vuere, za dôs robis scomudis pe cussience (Roberto Ongaro, Il muc)
   
   1. personificazion divine o rapresentazion artistiche di chel valôr:  la statue de Justizie, che cumò e je a Udin in place Vitorio, che e ven clamade «Marie Luigje», e jere a Buie intal lûc clamât «Locum Iustitiae» (Pieri Menis, Lis leiendis di Buie)
3. s.f. complès des autoritâts che a àn il podê di fâ rispietâ la leç:  tu viodarâs cetancj groputs che a vignaran tal pietin, se la justizie si metarà a sgarfâ tai tiei afârs (Josef Marchet, Lis predicjis dal muini); [in preson] a 'nd jere di chei che a lavin ator cul cjâf, e a contavin ducj di jessi vitimis di cualchi erôr de justizie (Carlo Sgorlon, Prime di sere)
   Cfr. magjistrature
4. s.f. aplicazion concrete de leç:  pardabon al è dai venezians che tu âs voie ancjemò di pretindi justizie, Cenci? (Franco Marchetta, Madalene)
   Sin. leç
   
   1. punizion che e va daûr di criteris subietîfs e no obietîfs:  la tô gjenie e je simpri pronte a fâ la sô justizie cuintri chei che e à in asse (Pieri Piçul, Vieri e gnûf)
      Sin. svindic , rife
5. s.f. [TS] teol. virtût cardinâl che e fâs ricognossi e meti in vore il ben
   
   1. potence di Diu, o Diu istès, che al premie o al punìs:  chei che no vuelin ben no san ce che al è il perdon e a batin su la justizie, iludintsi che la justizie di Diu e sedi come chê dai tribunâi di chest mont (Antoni Beline, Cumiât (par cuant che e rivarà la mê ore e no podarai dî nuie))
   2. ancje in invocazions o imprecazions:  al è muart il cont Ridolf, l'ultin dai Madiis, sence prole… e scumparìs cun lui une figure mistereose e sierade come une ombre: vadì no capide o impussibile di capî… Justizie di Diu, inalgò! (Dino Virgili, La aghe da pît la cleve)
      Var. ustizie

Polirematichis e espressions idiomatichis

• fâ justizie loc.v.
• rindi justizie loc.v.

Proverbis:

• al è miôr jessi in disgracie di Diu che no de justizie
• al è miôr pôc cun justizie che no trop cun pecjât
• cuant che e rive la fuarce, la justizie si slontane
• cui bêçs e cu la amicizie si cope la justizie
• fâ justizie al è scomençâ une buine strade
• l'aur al svuarbe la justizie
• la justizie e à lis mans lungjis
• la justizie e je dome che su la puarte dal cimitieri