Dizionari de Lenghe Furlane

imparâ  im|pa|râ  [FO]

1. v.tr. deventâ bon di doprâ une nozion o une capacitât:  imparâ i numars e lis letaris dal alfabet (Pieri Somede dai Marcs, Il gno prin mestri); al jere dîs agn che al vignive in Gjermanie ogni Primevere […] tant che al veve imparât cussì ben il todesc di fevelâlu come un di lôr (Pieri Menis, Sul agâr); Martin, invezit, al veve scomençât a lâ ca di un marangon di Tesis par imparâ il mistîr (Carlo Sgorlon, Il dolfin); al veve stât tal forest a imparâ il muredôr (Meni Ucel, Ideis)
   Sin. cjapâ sù
   
   1. ancje ass.:  a scuele a jerin lis primis scuasit in dut. A imparavin cence nissune fature, come bevi une tace di aghe (Carlo Sgorlon, Ombris tal infinît)
   2. tacâ a compuartâsi intune cierte maniere:  la int ator e veve di savê alc; ma ducj a vevin imparât a tasê (Maria Forte, Dome la cjampanute di Sant Bortul); si sta cussì pôc a imparâ a mangjaçâ, a bevaçâ, a straçâ (Riedo Pup, I furlans e la culumie)
   3. fâ cressi dentri vie une atitudin, un sintiment:  «Cjolilu» i diseve la mari preparant la taule. «A volêi ben tu impararâs cul timp […]» (Alan Brusini, Come tai romançs)
2. v.tr. rindisi cont di une situazion, des sôs consecuencis:  al veve imparât a sôs spesis ce che al podeve capitâ a menâ la lenghe e massime a fevelâ di politiche (Roberto Ongaro, Il muc); o vin imparât cemût che e resone e cemût che si compuarte la çampe in gjenerâl […] e la çampe furlane in particolâr (Adrian Cescje, Memoriis di politiche linguistiche)
   
   1. in espressions par cridâ, costumâ, visâ e v.i.:  vami fûr dai voi, e impare a tignî la lenghe a cjase (Luigi Gortani, Meni Fari)
   2. in espressions par complasêsi di alc di negatîf che al è sucedût a cdn. e che si calcole che al sedi meretât o che i puedi coventâ par scjalterîlu:  a 'nd à cjapadis ancje lui, une buine rate di legnadis, cussì al impare a cjoi pal cûl Tomât (Ciro di Pers, La Carlina)
3. v.tr. fâ che cdn. altri al sepi une informazion, une nozion e v.i. o al deventi bon di fâ alc:  ti impari jo, si fâs cussì…
   Sin. insegnâ¹ , inscuelâ

Proverbis:

• a fuarce di fâ, si impare
• ce che si impare di zovin no si dispare di vieli
• ce che si sa, si fâs; ce che no si sa, si impare
• cuant che si à imparât a vivi, in chê volte si mûr
• cui che al cjamine cui çuets al impare a çueteâ
• cui che al va cu lis craçulis al impare a çueteâ
• cui che al va cui çuets al impare a çueteâ
• cui che al va cul lôf al impare a urlâ
• cui che plui al sa al à plui gust di imparâ
• cul domandâ si impare
• cul fâ si fale e a fuarce di falâ si impare
• cul fâ si fale e cul falâ si impare
• fâ e disfâ, si impare a lavorâ
• fortunât cui che al impare a spesis dai altris e no a spesis sôs
• il mâl si impare cence mestris
• impare la art e metile de bande, il timp al vignarà che la art e valarà
• in miezore si impare a fâ i siôrs
• l'om che nol lavore al impare a fâ mal
• la prime educazion si imparile sui zenoi
• no si è mai viei par imparâ
• ogni mês si fâs la lune, ogni dì si impare une
• ognidun al impare a sôs spesis
• se tu vûs comandâ, impare prin a ubidî
• vivint si impare a vivi