fibre
fi|bre
[AF, TS]
-
s.f.
[TS]
biol.
struture dai tiessûts dai animâi, di forme slungjade, sfiliose, elastiche, flessibile e resistente:
il cerviel di diestre e chel di çampe a son in comunicazion fra di lôr cuntun miliart di fibris gnervosis (Franc Fari, Il cjâf dai furlans)
-
bot.
celule slungjade, a forme di fûs, cun parêts ingruessidis e spes lignificadis
-
alim.
intai aliments vegjetâi, tiessût fat soredut di celulose, che nol ven digjerît dal organisim uman, ma che al à in gjenar un efiet positîf di netâ l'intestin:
cui che al consume mangjativis plenis di fibris (cereâi integrâi, liùms, vegjetâi) al à un pericul minôr [di vê il diabete] (Guglielmo Pitzalis, Curâ il diabete)
-
s.f.
complès dai caratars psicofisics:
la atmosfere chenti e je pesante, cussì che e fâs deventâ la fibre plui rilassade e mancul disponude a sopuartâ lis fadiis (Adrian Cescje, Liniis di storie sociâl e economiche dal Friûl 1500 - 1800)
Sin. grene
, vite
, gnerf
-
s.f.
singul filament o complès di filaments che si puedin doprâ tant che materie prime par fâ filâts e tiessûts:
lis stofis a jerin di lanial e raion, no tignivin ni cjalt ni frêt, lis fibris artificiâls [sintetichis] no jerin cognossudis a chei timps (Alma Marega Frattini, Pôre de colpe)
-
s.f.
[TS]
tecn.
carton une vore compat, resistent e impermeabil, doprât, soredut une volte, par fâ valîs, cassis e v.i.:
passade la stazion di Reane Eliseo al tirà jù de rêt la valîs di fibre e al si invià de bande de puarte (Carlo Sgorlon, Prime di sere);
la cartele e jere di fibre, dure plui che no il corean (Gianni Gregoricchio, Îr e doman)
Sin. carton fibre
, fibre vulcanizade
-
s.f.
[TS]
tecn., telecom., inform.
viôt fibre otiche
:
potenziâ la bande largje e la fibre (Walter Tomada, La pandemie nus misure la autonomie)