Dizionari de Lenghe Furlane

falive  /-lì-/  fa|li|ve  [CO]

1. s.f. tocut di materie in bore che al svole sù di un fûc o ancje piçul toc slusint che al pues saltâ vie di un materiâl dûr che al ven batût, seât o sim.:  tor la fassine sclopete la flame / e falivis e fum van sù pe nape (Emilio Nardini, Albe); al veve cjatade une piere che a ogni colp di picon e jevave un nûl di falivis (Redento Bello, Misure)
   Sin. faliscje , lusigne
   Var. falibe
   
   1. chel tocut di materie che al è jevât sù, ma che al è aromai distudât e al cole jù o al è puartât vie dal aiar
2. s.f. (fig.) motîf, ancje piçul, che al prodûs a colp un efiet
   Sin. lamp¹
   
   1. piçul element o piçule cuantitât di alc che al pues jessi paragonât cul fûc o cu la lûs, par energjie, fuarce, positivitât e v.i.
3. s.f. floc di nêf o nêf fine:  la nêf, lui la veve tornade a cjatâ [...], lis falivis si cjavalgjavin tun volopâ svelt (Maria Forte, La tiere di Lansing)