Dizionari de Lenghe Furlane

cusine¹  /-ì-/  cu|si|ne  [FO]

1. s.f. locâl de cjase, o ancje di ristorants e v.i., là che si fâs di mangjâ:  stant alì, cence movisi mai, e dominave il so ream: la cusine grande come une arie, cu la panarie e la vetrine, une gratule plene di plats a rosutis rossis e blu e une schirie di padielins e stagnadis di ram dulinvie parsore il seglâr, la puarte dal camarin cul formadi e la robe purcine, i cits dal ont e il caratel dal vin (Pieri Menis, Agne Ursule); a saran stadis siet, e la taule e jere preparade pe cene e la polente za strucjade e jemplave la cusine di bonodôr (Alan Brusini, La cartuline); tal mieç, il plui grant, al jere il locâl dal comant di bataion e vie vie, la mense dai uficiâi, lis cusinis, magazens e dipuesits, e po lavoratoris e dormitoris pe trupe e pai uficiâi (Pieri Menis, La glesiute dai alpins)
   Sin. cjase
   Cfr. fogolâr
2. s.f. tecniche, art, mût di fâ di mangjâ:  di cualchi an in ca - potence de globalizazion - si sin ducj abituâts a vê une cierte familiaritât cui savôrs des cusinis di dut il mont (Margherita Timeus, Cusine etniche, parinte strete de cusine furlane); lui stes al scrîf di jessi friand (golôs), gourmand e ancje gourmet, ven a stâi un che i plâs mangjâ ben e un che al è espert di cusine e di vins (Pierluigi Visintin, Friûl e furlans te Histoire de ma vie di Giacomo Casanova)
   Sin. culinarie , gastronomie
3. s.f. complès dai mobii che a son inte cusine:  comprâ une cusine gnove

Polirematichis e espressions idiomatichis

• cusine sporcje loc.s.f.
• sierâ la cusine loc.v.

Proverbis:

• a Sante Catarine il frêt al va in cusine
• ancje in cusine i cjaldîrs e àn lis orelis
• i fals amîs a son come lis moscjis: fin che a cjatin di mangjâ a stan in cusine
• il sâl al sta ben in cusine come pardut
• la cusine e mangje la cantine
• scure la marine: mangje, bêf e sta in cusine; clare la montagne: bêf e va in campagne
• trê robis a fasin scjampâ la int di cjase: la cusine fumose, la femine rabiose e la cjase discuvierte