contentâ
con|ten|tâ
[FO]
-
v.tr.
fâ jessi content, sodisfat cdn., ancje concedint alc par fâlu stâ ben o par fâlu stâ bon:
al è interès di ogni guvier contentâ il plui grant numar pussibil dai siei sogjets, se al vûl durâ (Josef Marchet, La scrassigne);
i prins mês dut al leve ben: buine Perine sô madone, bon Checo so missêr; e jê si butave in cuatri par contentâju (Pieri Somede dai Marcs, A jerin lagrimis)
Sin. apaiâ
, esaudî
, sodisfâ
, complasê
-
v.tr.
dâ plasê a une part de persone, a un dai sens, a une componente psicologjiche e v.i.:
un stâ ducj insiemi che al contentave il cûr (Alan Brusini, Come tai romançs);
«Bon, bon! Un vin che al à grinte, che si tache ben!» e lu tirave jù a tacis, cjalant il sofit come un gnûf paradîs. Si scusave. «Nol è par gole di bevi, dome par contentâ la bocje» (Maria Forte, La tiere di Lansing);
i plaseve fâ lis robis cun ordin, e in mût che a contentassin ancje il voli (Carlo Sgorlon, Prime di sere)
Sin. sodisfâ
, passi
, complasê
, apaiâ
-
v.tr.
dâ esecuzion, sodisfazion, rispueste e v.i. a alc che al covente, che al ven domandât o a cdn. che al à domandât un servizi, une marcjanzie e v.i.:
parfin Margarite, la parone, i voleve ben par chel so mût di fâ, chel contentâ i clients in dutis lis manieris, chel cumbinâ lis robis che nissun nol jesseve de buteghe cence vê comprât (Alan Brusini, Amîs come prime);
cun C si vûl nomenâ i bens e servizis di consum, che a son produsûts par contentâ lis dibisugnis des fameis (Marzi di Strassolt, Dal Prodot Interni Lort aes misuris dal benstâ)
Sin. corispuindi
, rispuindi
, sodisfâ
-
v.tr.
(ass.)
de famee dal morôs, lâ a fâ la prime visite formâl ae famee de morose par fâ la impromission:
tacade le carete tîr a doi cun sô mari e so pari cu la mace dal pomul di arint e i bregons a sbuf sore lis cjalcis blancjis, al leve a Riçûl a contentâ (Alan Brusini, Come tai romançs)
Proverbis:
- a volê contentâ une nuvice e ven la stice
- al è impussibil di contentâ ducj
- predis e pastôrs no contentin mai ducj