Dizionari de Lenghe Furlane

colone  /-lò-/  co|lo|ne  [FO]

1. s.f. element architetonic fat pal solit di une base, di un tronc, spec. a cilindri, e di un capitel, doprât par tignî sù o par bielece:  lis colonis [di Olimpie], che si drecin sù tra la jerbe, a somein une anomalie, une magjie che e ven dal passât lontan, cu la lôr regolaritât, cu la lôr evidente pretese di regolaritât gjeometriche (Adrian Cescje, Viaç aes origjins dal Logos); si voltà de bande dal curtîl e al viodè Ricardo che al cucave daûr de colone rosse dal puarton (Carlo Sgorlon, Prime di sere); i lens, come colonis di catedrâl, cun ricams di lichil su la scusse, a fasevin un puest simpri sigûr par dutis lis bestiis (Maria Forte, La tiere di Lansing); te stale di Zaneto, la trombe dal fen e coreve jù tal cjanton, dongje une colone fuarte di piere (Maria Forte, I arcs)
   
   1. monument che al à la forme di chel element architetonic ma che nol ten sù une costruzion:  ae colone cu la Madone in Place Sant Jacum a Udin, i disevin ancje Pinacul di Marcjât Gnûf
   2. element verticâl di piere cu la stesse forme dal element architetonic ma destinât a incjadenâ, par antîc, lis personis condanadis a un suplizi:  a contin che tal mieç de place al fos un puest plui alt pai caporions e une colone cu la berline e lis cjadenis, parsore un çucul, cun pieris scritis e ben sculpidis (Pieri Menis, Lis leiendis di Buie)
2. s.f. (fig.) persone che e ten sù un grup, une comunitât o sim.:  il princip che al incjarne l'interès dal so popul e che al esist dome in gracie di lui, al aparìs tant che la colone di une costruzion politiche che no varès podût concretizâsi cence di lui (Fabian Ros, La invenzion dal stât); a Rome a levin a venerâ il tombâl di Sant Pieri, insiemi cun Sant Pauli une des dôs colonis plui fuartis de glesie (Antoni Beline, Sant Jacum, là che al finìs il mont)
   Sin. pilastri
3. s.f. [TS] tecn. tubul di forme cilindriche metût in pîts dulà che a passin fluits:  l'idrogjen peât cul ossigjen (H2O), rindint plui o mancul umit l'aiar al jere dal sigûr un probleme che, in chê volte, si risolveve obleant l'aiar a rimontâ lungjis colonis in veri jempladis di cjalcine vive (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   
   1. fluit contignût intun volum cilindric concret o ideâl:  la pression atmosferiche su la superficie e je compagne dal pês di dute la colone di aiar che e sta parsore di un metri cuadri di superficie (Stefano Micheletti, Marcellino Salvador, Notis di meteorologjie pal Friûl - Vignesie Julie)
4. s.f. [TS] tecn. element verticâl cilindric che al permet a un machinari di movisi daûr di une linie verticâl precise:  il Mistri si fermà denant de colone di une frese e al esaminà i pecoi di cocjete (Eugjeni Marcuç, Liende a Sant Zuan)
5. s.f. [CO, TS] tipogr. division, scompart verticâl di un sfuei, di une tabele, di un test e v.i.:  la redazion e met lis sôs colonis a disposizion di ducj chei che e àn sâl te coce e dreture ta la anime, ben contente che «Patrie dal Friûl» e deventi une palestre di studis e di discussions utilis pal doman de Regjon Furlane (Josef Marchet, E cumò?); un grant biel titul su cuatri colonis al cjantave cussì: «Un sindaco ricorda ai giovani di leva: è un diritto l'obiezione di coscienza» (Riedo Pup, Il partît dai zovins coscrits); provìn a meti i numars in colone (Marc Stolf, Keep calm e freìnsi de Nutella!); il poeme al è scrit in 6 colonis, 2 par ogni façade (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
6. s.f. [CO, TS] milit. formazion di soldâts o mieçs militârs o personis armadis o cun intenzions violentis che si movin de stesse bande pe stesse operazion:  tun moment si sintì a trai un, doi, trê, … colps di canon, po dute une batarie che dal alt di une culine i smirave ae colone (Pieri Menis, Sul agâr); blocade une prime colone di contadins che di dute la Basse a marcjin viers Çarvignan par tirâ fûr, ancje cu la fuarce, il lôr eroi, siet mil operaris si movin dai cantîrs di Monfalcon e, menaçant di brusâ preture e presons, a fasin liberâ Minut (Carli Pup, La seconde Irlande)
   
   1. intune organizazion clandestine, unitât cun competencis teritoriâls o operativis determinadis
7. s.f. cuantitât di int o veicui un daûr di chel altri che a van o a cirin di lâ de stesse bande:  tai fins di setemane di Avost la autostrade si jemple di colonis di machinis di turiscj
   Sin. code , file¹
8. s.f. [TS] zûcs tai scacs, grup di vot caselis disponudis in verticâl:  il roc si môf dret, par traviersis e par colonis (Nilde Teresa Negro, Zuìn di scacs)
9. s.f. [TS] gjeol. concrezion calcarie di forme cilindriche des grotis cuant che si saldin stalatite e stalagmite
10. s.f. (fig.) cualsisei robe di forme plui o mancul cilindriche e plui o mancul verticâl:  un pôc in bande e jere une fontane di piere, che e butave fûr une colone di aghe frescje come la nêf (Carlo Sgorlon, Il dolfin); la grande bale di fûc e sclope in milante sclesis. Une grande colone di fum neri e penç si alce cuant che i pelegrins a clotein tal desert. Isal stât il Signôr dai esercits a tirâ chê bale di fûc? (Checo Tam, Gargantua cuintri i Panzergrenadieren)
11. s.f. (fig.) persone che si vuelii ben:  cjolmi pûr, cjare colone / che di dut chel che al è gno / jo cumò ti fâs parone / sì tal doni e al sarà to (Ermes di Colorêt, II, 70); nanà pipin colone / tô mari che ti à fat no ti bandone (Popolâr, Nanà pipin colone)

Polirematichis e espressions idiomatichis

• meti i numars in colone loc.v.

Proverbis:

• fâ, savê fâ e dâle di intindi a son lis trê colonis dal mont
• se e je ben vistude, ancje une colone a pâr une done
• se e je ben vistude, ancje une colone a pâr une matrone
• se si vistìs une colone, e pâr une done