animâl
a|ni|mâl
[FO]
-
s.m.
creature vivente in stât di movisi e di vê sensazions:
la propagazion dei animâi e des plantis (Federigo Comelli, Il me paîs)
Sin. bestie
Var. anemâl
, nemâl
, enemâl
, namâl
-
[TS]
zool.
creature vivente in stât di movisi e di vê sensazions, organisim dal ream dai Animâi, che si diferenzie di Moneris, Protiscj, Plantis e Foncs
-
adi.
di chei organisims:
rigjavâ da chescj vocabui chel, che te future lenghe leterarie ladine (o almanco furlane), al dovarà sei preferît par indicâ cun precision tâl da garegjâ cun la nomenclature sientifiche, une determinade specie animâl o vegjetâl (Achil Telin, La Patrie Ladine, I, 2)
-
s.m.
bestie dumiestie, soredut di stale:
no passave zornade che ur las di tori un anemâl, o un cristian jù par cualchi ruvîs (Luigi Gortani, Il Deu di Cjargne)
Sin. bestie
-
s.m.
(fig.)
persone cence creance o cence sintiments o cence carateristichis fondamentâls che a son tipichis dai umans, ancje tant che ofese:
un bocon di animâl che al crôt di jessi furbat e invezit ae fin al fâs la part dal pote (Angelo Floramo, Salvadis e dordei i oms, lovis lussuriosis lis feminis: il ritrat dai furlans di Franco Sacchetti)
Sin. bestie
, besteate
-
adi.
che al è grês, pôc razionâl o che al à carateristichis che a son plui fuartis tes bestiis che tes personis:
Sabrina e si netavo i avris cul tavaiuç duto precisino, ma no ero rivado a platâ la fam anemâl cun la cuâl e vevo mangjât fôr dut il pôc che al ero (Fulvio ReddKaa Romanin, Geologicamente impossibile)
Sin. bestiâl
-
ancje di robis, che al à o al mostre une fuarce istintive, no razionâl, che no si pues controlâ:
al regne l'Istât paian, salvadi, anemâl (Dino Virgili, La aghe da pît la cleve)
-
adi.
dai animâi, che al à a ce fâ cui animâi, ancje par vie che al è destinât a lôr o che si oten di lôr:
i vegjetarians a son chei che no mangjin cjar e pes, i vegans no mangjin nancje chei altris derivâts animâi: ûfs, lat… (Bete di Spere, Vegan);
mangjativis plenis di zucars sempliçs e di gras animâi (Guglielmo Pitzalis, Curâ il diabete);
rescj di tiessût di lin e di fibre animâl, forsit lane (Andrea Pessina, Gaetano Vinciguerra, La preistorie in Friûl)