Dizionari de Lenghe Furlane

vê daûr    [CO]

1. loc.v. vê cdn. o alc de bande de schene, che al ven daûr:  "Cuant che o mûr, no vuei vê daûr predis neris come corvats, dome bandieris rossis e musiche di bande…" (Jolanda Mazzon, Di là de rêt)
   
   1. vê tant che esperience o vicende passade:  si maraveave che, a moments, i parès di no vê nuie daûr di se e che, subit dopo, il frutin di une volte e il zovenot di cumò a fossin dutun (Gianni Gregoricchio, Îr e doman)
2. loc.v. vê alc o cdn. cun se:  i faseve dûl par vie di chê sô sudizion che, tantis voltis, i copave lis peraulis in bocje. Cussì al sopuartave di vêlu daûr (Gianni Gregoricchio, Îr e doman)
3. loc.v. podê fâ stât su cdn. o su alc:  "De sô femine sì, si po infidâsi… che e à daûr di se chês di Aonedis… E jo o ai procure di chei dal Ciman…" (Alviero Negro, Int di masnade); nol è un câs che al sedi cui che al sosten che «une lenghe e je un dialet che al à daûr un esercit» (Marc Stolf, Minorancis linguistichis)
4. loc.v. vê tant che responsabil o tant che motîf platât o profont:  cui vêso daûr? Cui us paie? (Max Mauro, Felix Marchi e il sium dal furlan-furlan); il terorisim basc al à daûr resons politichis e sociâls complessis (William Cisilino, Il probleme dal terorisim)
   Cfr. vê sot

Components:

• daûr av., prep., adi.inv., s.m.sing., s.m.inv.
• vê v.tr., v.aus.