Dizionari de Lenghe Furlane

tu  tu  [FO]

1. pron.pers. pronon personâl di seconde persone singolâr:  "Tu ti lamentis tu, e jo ce varessio di pretindi?" (Pieri Somede dai Marcs, Un pugn di moscjis); "Jo o capìs che ce che ti è tocjât al è teribil, ma tu no tu âs colpe […]" (Roberto Ongaro, Il muc)
2. pron.pers. cun valôr impersonâl:  se tu sês sposât e pari di famee, tu pensis ae femine che e lavore il dopli e ai fruts che ti spietin come sisilutis intal nît (Cristina Noacco, Faliscjis)
   Sin. un¹ , si¹
   
   1. (enf.) in costruzions retorichis, massime te forme di datîf, par dâ sens di confidenzialitât o ancje par dâ plui vivôr a une azion, descrizion e v.i., li che la seconde persone singolar e pues jessi in cualchi maniere il destinatari dal discors, il letôr o ancje mancjâ dal dut:  ti àn capît che o jeri un om cence pretesis e ambizions (Alan Brusini, Gian Paolo Linda, I forescj)
3. s.m.sing. complès des formis di seconde persone singolâr, tant che ûs par pandi confidence, familiaritât:  "Nita… tu…" i dave dal tu, no i veve mai dât dal tu e chel «tu» butât li, cumò, cu la vôs che i tremave tal cuel, al fo come un sclop di cûr (Dino Virgili, La aghe da pît la cleve); al trate ducj dal tu (Pieri Corvat, El cuarantevot)

Polirematichis e espressions idiomatichis

• a tu a tu loc.av.
• a tu a tu cun loc.prep.

Proverbis:

• al mene la code il cjan no par te ma pal pan
• ame cui che ti ame e rispuint a cui che ti clame
• ce che tu âs semenât, al è nassût; ce che tu âs insedât, al à menât
• cent a ti e une a mi
• cjale chei piês di te e tu sarâs content
• conte i tiei botons e po tu contarâs i miei
• cul fâur ben ai altris tu fasis ben par te
• dai cops injù tu sâs ancje tu, dai cops insù dome il Signôr
• di un avâr tu puedis sperâ alc, di un lôf no stâ sperâ nuie
• fâs ai altris ce che tu volaressis fat a ti
• fin al zenoli ogni voli, dal zenoli insù nome jo e tu
• i dîs il cuviert al paron: se no tu vegnis sù tu, o ven jù jo
• jo la colpe e tu la polpe
• juditi tu che ti judarai ancje jo
• mangje tu che o mangjarai ancje jo
• no stâ fâur ai altris ce che no tu vûs che ti fasin a ti
• novantenûf a mi e une a ti
• robe di Gjo, mangje tu che o mangji jo
• se tu fâs ce che ti dîs, tu larâs in paradîs; se tu fâs ce che o fâs jo, no tu vâs ni tu ni jo
• vuê a mi, doman a ti