tierç
/-è-/
tierç
[FO]
-
adi.num., pron.num.
che intune serie al à il puest dal numar trê, ancje s.m.:
la tierce volte lis robis si scuen capîlis par fuarce, come Sant Pieri cuant che il gjal al cjantà (Carlo Sgorlon, Ombris tal infinît);
o ai doi fîs sot la naie e un tierç che al sta par lâ sot (Alan Brusini, La cartuline);
di puescj pal dotorât a 'nd jere cuatri: doi cun borse di studi e doi cence; […] la borse di studi no mi interessave e mi sarès bastât rivâ tierç o cuart (Sandri Carrozzo, Piçulis storiis di mafie furlane)
-
di secul, che al va dal an 201 al 300:
des bandis di Aquilee a son stadis cjatadis monedis di arint celtichis dal tierç secul prin di Crist (i Romans a saressin rivâts dal 181 p. di C.) (Josef Marchet, Cuintristorie dal Friûl fin sot la Italie)
-
di mileni, che al va dal an 2001 al 3000:
il sît di Olimpie al fo abitât fintremai dal tierç mileni (Adrian Cescje, Viaç aes origjins dal Logos)
-
s.m., adi.num.
ognidune des trê parts compagnis di un alc divisibil, ancje adi.:
su la presince dal furlan tes scuelis, a son favorevui plui di doi tierçs dai intervistâts (Donato Toffoli, Relazion dal Grup di lavôr "Planificazion linguistiche");
i Langobarts di solit, cu la leç romane che a vevin lôr, a cjolevin la tierce part dai terens par lôr (Francesc Placerean, La nestre storie)
-
s.m.
persone che no je part ative intun fat, intune situazion, intun rapuart ancje di dirit:
i components dal Ufici di Presidence, tant che aministradôrs, a rispuindin tai confronts dal Ent, dai creditôrs sociâi, […] e di tierçs daûr de normative in vore (SFF, Statût de Societât Filologjiche Furlane)
Sin. altri
, estrani
, forest
Polirematichis e espressions idiomatichis
Proverbis:
- fra doi litighents il tierç al gjolt
- i vedui il prin dì a vain, il secont se passin, il tierç se ridin
- il prin al busse e imbrace, il secont nice e fasse, il tierç an il malan e la malepasche
- il prin dì di Inseri al è sant Pas, il secont sant Crepìn, il tierç sant Sclop
- la prime volte si perdone, la seconde si tontone e la tierce si bastone
- prin di Mai Sant Jacum e Filip o cjatai, tierce dì Sante Crôs e fuì, un pôc plui tart Sant Gotart, e tal doman Sant Florean
- tra i doi che a cavilin, il tierç al sta in capitâl