Dizionari de Lenghe Furlane

strete  /-è-/  stre|te  [AF]

1. s.f. azion di strenzi:  [Amôr] dal so turcàs gjave une frece, / e tant che al po si drece, / al arc al da une strete... / L'afâr l'è fat, feride è la polzete (Pieri Çorut, Pes gnocis Fabris-Bearç)
   Sin. strente , strenzude , strenzon
2. s.f. strade strete:  al veve sot i voi dute la place: une plaçute grande tant che doi strops di lidric, cu la androne che si va in comune e la strete che si va in canoniche (Pieri Menis, Il «comandatôr»); il cjaval al cjapave just il volt de strade sot il cuel dal Fum, al saveve aromai dutis lis stretis dai borcs e no si ombrive pal sunsûr de Ledre (Maria Forte, L'avôt)
   Sin. androne , gosse
   
   1. passaç stret:  chel camin, lu cognòs benon, par vie che lu ai netât plui voltis, di zovin, [...] al à une strete che il pari di Baldo Cuartut, puar Mondo, al à fat fâ, che jo o jeri inmò un fantaçut, par vie che il camin nol tirave ben e, par chê strete, no un om, ma nancje un frutin, nol passe (Roberto Ongaro, Cretevierte)
      Sin. stret , strente , strentoi , streture , strangoi
3. s.f. (fig.) pont, passaç plui dificil, plui critic:  e sarès stade la rivincite di chê clape e la distruzion de mê fadie par concuistâ une vere politiche linguistiche de lenghe furlane che e scugnive passâ pe strete de grafie unitarie normalizade (Adrian Cescje, Memoriis di politiche linguistiche)
4. s.f. [TS] lit. sorte di tonie che il diacun al met parsore di chês altris viestis

Polirematichis e espressions idiomatichis

• a lis stretis loc.av.
• aes stretis loc.av.