stâ fûr
[AF]
-
loc.v.
jessi de bande difûr, de bende esterne di un lûc, di un ambient o ancje di un concet, di alc di astrat e v.i.:
e plui inlà la ultime strade, triste di polvar, che a divideve la citât dal desert di tuessin che al stave four (Stiefin Morat, Kebar krossè);
il probleme vêr par lui però al jere che al fevelave il lengaç dai nazionalitaris, che a jerin pe autodeterminazion des nazionalitâts, che pai politics de çampe taliane e steve fûr des lôr ideis e de lôr capacitât di comprension (Adrian Cescje, Memoriis di politiche linguistiche)
-
jessi fûr di cjase o dal puest di vore o di un puest solit:
a voltis si intardavin ducj a mangjâ par spietâlu se al stave fûr plui dal ordenari, e a cjalavin l'orloi dome par lui (Maria Forte, Cjase di Dalban);
"Va e viôt di tôs sûrs, Line e Mariute, compagnilis a cjase e viodêt di no stâ fûr fin a straoris…" (Pieri Menis, Chei di Muraie)
-
loc.v.
no cjapâ part intune discussion, intune ativitât, intune organizazion e v.i.:
jessint part in cause, al faseve ben a stâ fûr, parcè che lis sôs peraulis dificilmentri a vignivin cjapadis come disinteressadis (Antoni Beline, Un "Sì" grant come lis monts)
-
loc.v.
vê bêçs impegnâts intun invistiment, intun prestit, intun anticip di une spese e che pal moment no puedin jessi recuperâts e doprâts in cualchi altre maniere:
"Vô o vês volût fâ i vuestris comuts, e… al è tart, aromai… masse tart… Jo no pues stâ fûr plui di tant. Viodêso?" E i svintulà une cjarte cun boi e timbris devant la muse. "O ai scugnût poiâmi su la cjasute; no podevi stâ fûr cun bêçs… o firmais culì…" (Dino Virgili, La aghe da pît la cleve);
intant però la associazion e à scugnût indebitâsi cu lis tipografiis e stâ fûr cu lis spesis de sede, dal telefon, de telematiche e dal personâl (Antoni Beline, Eutanasie culturâl)
Components:
-
fûr
av., prep., inter., adi.inv., s.m.sing.
-
stâ
v.intr.