Dizionari de Lenghe Furlane

signôr  si|gnôr  [CO]

1. s.m. [CO, TS] stor. cui che al è paron di un possediment:  dongjo la cjaso delj signôrs di Cucagno (Antoni Zintîl, Cuader de fradaie dal Sant Spirit di Cividât, 1425)
   
   1. cui che al domine un teritori:  citadins udinês, al è tant bon / e gjenerôs l'august nestri signôr; / ce che nol po neâ, se ben paron, / nus concêt, prest o tart, come un favôr [la costituzion] (Pieri Corvat, El cuarantevot)
2. s.m. [BF] om in sens gjeneric, ma pal solit in riferiment a cui che al è di classe alte, ancje tant che titul di rispiet, viôt siôr :  "Comandiel alc, signôr?" (Bepo Marion, La morose di Carlo)
3. s.m. divinitât de religjon cristiane, in particolâr in riferiment ae persone di Crist:  il Logos si identifiche cul stes Crist, signôr e creadôr dal mont (Adrian Cescje, Viaç aes origjins dal Logos)
   Var. Signôr
   
   1. in esclamazions, par pandi diviersis sortis di emozions, tant che malpazience, rabie, rassegnazion, maravee, sodisfazion v.i.:  o signôr, ce mont dificil... (Dree Venier, Stiefin Taboghe, Un avatar furlan nus fevele di «Second Life»)
   2. rapresentazion artistiche di Crist, soredut di Crist in crôs:  chel signôr al era za da cualchi an vignût frait ta part che a poiava su la tiera (Albino Cleva da Pesaria, Il Signôr grant e chel piçul)
   3. (fig.) forme che e pues someâ chê dal crucifìs, lassât di cui che si bute par zûc te nêf fofe:  i fruts a vadin a fâ «signôrs» te nêf, butantsi jù par daûr cui braçs a larc (Dino Virgili, La aghe da pît la cleve)
   4. (fig.) persone grande come une statue di glesie:  lu clamavin ‘Sefon par vie che al jere un bocon di signôr di scuasi doi metris (Laurin Zuan Nardin, Gnocis furlanis)

Proverbis:

• a chei che ur sierin la puarte, il Signôr ur spalanche il puarton
• a un che nol à ce fâ, il Signôr i 'nd da
• al sa ben il signôr parcè che no ur à fat i dincj a lis 'savis
• ancje il Signôr al è dismontât di mus par cjapâ sù un fasûl
• ancje il Signôr al è furlan: se nol paie vuê, al paie doman
• ce che al fâs il Signôr al è dut ben fat
• ce che nol fâs il Signôr al fâs il sartôr
• chê che al da il Signôr si le puarte vulintîr, chê che si fâs di bessôi e je plui pesante di puartâ
• cuant che il Signôr al vûl pierdi un, i cjol il judizi
• cui che al ame il Signôr al ame ancje i sants
• cui che al crôt di fâje al Signôr, se fâs par se
• cui che al spude in face, il Signôr no si impace
• cui che no i crôt al Signôr i crôt al diaul
• cui che nol cjale in face, nancje il Signôr no si impace
• dai cops injù tu sâs ancje tu, dai cops insù dome il Signôr
• daûr dai merits il Signôr al paie
• dut si po onzi fûr che il Signôr
• i miedis: preâ il Signôr che a son e po no vênt dibisugne
• il mulinâr al met il Signôr difûr par che nol viodi ce che al fâs dentri
• il Signôr al à aghe par bagnâ ducj
• il Signôr al à dut in man: se nol paie vuê al paie doman
• il Signôr al à la mace lungje
• il Signôr al à la man lungje
• il Signôr al à la scorie lungje e al rive pardut
• il Signôr al cjastie i siei
• il Signôr al è muart par nô ma jo no mûr par nissun
• il Signôr al è piçul ma al cres ogni dì
• il Signôr al è un grant infant: al paie no si sa cuant
• il Signôr al lasse cori ma no trascori
• il Signôr al mande il frêt daûr de vieste
• il Signôr al rive di lontan
• il Signôr al sa ce che al fâs
• il Signôr al siere une puarte e al vierç un barcon
• il Signôr al tocje i siei e jo mi tocji i coions
• il Signôr al visite i siei
• il Signôr ind à di dânt a ducj
• il Signôr ju cree, il diaul ju incee
• il Signôr ju fâs e il diaul ju compagne
• il Signôr no i vûl mai mâl a ducj
• il Signôr no ur da i dincj ai crots par che no çoncjin il palût
• il Signôr nol paie ogni sabide, al va ben planc ben planc, e vie pal timp al va tacant
• il Signôr nol vûl mai nissun di content
• il Signôr nus à batiâts in chê dì che si è nassûts
• il Signôr nus vuardi dai invidiôs
• il Signôr nus vuardi dai scalçs di zupet
• il Signôr nus vuardi des tristis lenghis
• il Signôr prin ju fâs e po ju compagne
• la buine dote le da il pari, la buine femine il Signôr
• nome il Signôr al è infalibil
• pan e Signôr a 'nd è par ducj
• se il Signôr al mande il frut, al mande ancje il pagnut
• se il Signôr al siere une puarte, ind vierç cent
• se il Signôr al siere une puarte, ind vierç dôs
• se il Signôr nol rimedie, il diaul al fâs comedie
• sore sâl nol è savôr, sore diu nol è signôr
• un matrimoni fra doi zovins al è un matrimoni dal Signôr, un matrimoni fra doi viei al è un matrimoni di mierde, un matrimoni fra un zovin e un vieli al è un matrimoni dal diaul