Dizionari de Lenghe Furlane

sgrisul¹  /-ì-/  sgri|sul  [FO]

1. s.m. contrazion involontarie e ritmiche, pal solit pôc fuarte, dai muscui che e pues jessi causade dal frêt, de fiere o di une emozion, spec. de pôre:  al sintive i sgrisui jù pe schene, par vie dal sudôr che l'aiar i glaçave aduès (Carlo Sgorlon, Prime di sere); al restà par un biel toc cu la panze injù, travanât di sgrisui (Amedeo Giacomini, Tal ospedâl); cjapant la cjicare dal cafè des mans de Leni, i veve tocjât la sede de piel e si jere sintût a cjapà di un sgrisul, dai pîts ae lidrîs de cope (Maria Forte, La tiere di Lansing); "O ven subit" i rispuint il fari [al diaul], che a viodii la code si jere sintût a cori i sgrisui pe vite (Luigi Gortani, Meni Fari)
   Sin. trim , raze¹
   Var. grisul , ingrisul
   Cfr. sgrisulon , sgrisulaç , pics , paniç
2. s.m. (fig.) emozion fuarte o che e somee che si produsi come une vibrazion:  al è come se da fonts da la anime un sgrisul di salvadi e di antîc al vignìs sù cence savê parcè e cemût (Dino Virgili, La aghe da pît la cleve); un inamorât si vise di ducj i particolârs e al sint ancjemò il sgrisul de prime strente e de prime bussade (Antoni Beline, Sant Jacum, là che al finìs il mont)
   Sin. emozion , gole ipon. , sbisighin ipon. , smalit , trim
   
   1. sensazion di pôre:  che no vessin crodût che la muart i faseve pôre,… ancje se, dentri, il sgrisul al jere plui grant di lui e i dissomeave la muse (Maria Forte, Cjase di Dalban)
3. s.m. (fig.) vibrazion o fenomen che al somee vê vibrazions:  tal suspirâ de sere al restave cualchi sgrisul di lûs - il cimiâ des stelis o il tremâ des lusignutis (Dino Virgili, La aghe da pît la cleve); ce maravee, un sgrisul di bufulis sul mâr che al pareve un pedrât (Alan Brusini, Come tai romançs)
   Sin. trim , smalit

Polirematichis e espressions idiomatichis

• fâ vignî i sgrisui loc.v.

Proverbis:

• il prin e l'ultin sgrisul a son chei pericolôs