sfidâ sfi|dâ [AF]
- v.tr. invidâ un aversari o un nemì di confrontâsi o di batisi: la condote "eroiche" de vuere e voleve che devant de sdrume dai soldâts si olsassin a lâ i campions che si svantavin par scunî i aversaris e ju sfidavin a singul duel (Sandri Carrozzo, Il Hildebrandslied e la nassite de epiche gjermaniche)
- v.tr. (fig.) invidâ, provocant, a fâ alc che al è o che al somee impussibil o dificil: jo no ai mai voltât bandiere. O sfidi brâf cui che al podès acusâmi di vê tignût man a Tizio o a Sempronio par menâ pal nâs sâr popul e done int (Guido Antonioli, Florean dal Palaç, I, 1)
- v.tr. (fig.) frontâ cun fuarce e cun cûr un alc di contrari o di pericolôs: o jerin pronts a sfidâ i pericui! (Checo Tam, Sense)
- v.tr. (fig.) lâ cuintri di alc che al è une vore fuart, autorevul, acetât di ducj e sim.: Stiefin Montel, al scrîf un libri par percori la storie de bande furlane che vie pai prins agns dal '90 e à sfidât la tradizion par dâi ae musiche furlane une gnove muse (Piero Cargnelutti, Ghitare rimite)
- v.tr. (ancje ass.) in espressions enfatichis, par dî che si è sigûrs di alc, che alc al è clâr: "Tu sês ca, tu, tu sês ca a parâlu, chel bocon di macaco: tu sês ca! Sfidi jo, al è il to fion. Ma cjo! Tu sês cause ancje tu, di dutis chestis pantuminis…" (Anute Fabris, A passe la scalmane); al cognosseve i nons di ducj, ogni stradele, ogni rivâl, ogni cunete e parfin cui che a jerin i parons dai cjamps! O sfidi jo: cuant che il perît al leve a cjapâ cualchi misure, il vuardian nol podeve mancjâ! (Lucio Perès, Vigji il vuardian)