Dizionari de Lenghe Furlane

scuele  /-uè-/  scue|le  [FO]

1. s.f. organizazion educative publiche o privade, par slargjâ la istruzion, la culture, la preparazion professionâl cul insegnament coletîf e metodic:  la scuele e à l'oblic di aplicâ la leç statâl n. 482/99 […] e à dentri bielzà lis regulis che a rivuardin l'ûs dal furlan a scuele tant che ogjet (materie) e tant che imprest di insegnament (Silvana Fachin Schiavi, I dîs agns de leç n. 482/99)
   Cfr. istruzion
   
   1. singule struture dulà che si da une istruzion:  Loris, te scuele di Padier, simpri tal prin banc, al veve imparât a cjantâ lis silabis sul libri (Dino Virgili, La aghe da pît la cleve)
      Sin. istitût
   2. ancje tal pl., edifici dulà che al à sede chel istitût:  dopo cualchi an che o tignivi lis redinis dal comun […] o vevi pensât di fâ lis scuelis gnovis a Pantianins (Pieri Somede dai Marcs, Lis scuelis e la nêf)
   3. complès dai arlêfs, dai insegnants e dal personâl che al lavore pe istruzion, spec. intun ciert istitût:  a son stâts metûts in vore imprescj didatics, struments di ecelence, de bande des scuelis (Patrizia Pavatti, Insegnament dal furlan - la norme "in situazion": tra regulis e plan de ufierte formative)
2. s.f. organizazion che si cjape sù l'assum di insegnâ une ativitât specifiche:  o tornavi cjase aes cinc di sere, par po tornâ di gnûf a Sant Denêl, pe scuele serâl di dissen (Oscar Puntel, Mario Collavino: une bandiere furlane parsore il gnûf World Trade Center di New York); o frecuentavin la scuele di teatri dal Css e tra lis ativitâts e jere chê de publicitât teatrâl (Max Mauro, Un Friûl difarent: i 90 mhz di Onde Furlane)
3. s.f. ancje tal pl., ativitât o complès di ativitâts di insegnament e di aprendiment:  finît l'an di scuele, mi veve passât ae seconde classe, e cussì l'an dopo mi soi presentât al mestri Bastian (Pieri Menis, A scuele); chel daspomisdì, l'ultin prime che e tornàs a tacâ scuele, […] a vevin sielzût il motîf de fieste grande di fin Istât (Gianfranco Pellegrini, Fieste grande di fin Istât); chel frut li, vuarfin di pari, al veve començadis lis scuelis cun Mirco (Alan Brusini, Par stradis lungjis)
   
   1. culture o formazion o complès di cognossincis che a derivin dal fat di vê vût insegnaments:  jo o soi un puar om cence letaris e cence scuele, che o ai scugnût tacâ di dîs agns a cuistâmi la bocjade (Josef Marchet, Lis predicjis dal muini)
4. s.f. il complès di chei che a van daûr des stessis ideis filosofichis, artistichis, sientifichis e v.i. o che a àn imparât di un stes mestri o che a colaborin cun lui e v.i.:  la Scuele di Milet e scomençà une tradizion che no sarès mai plui cessade. E butà lis fondis des costruzions razionâls esplicativis dal sisteme dal mont (Adrian Cescje, Viaç aes origjins dal Logos); [Domeni di Tumieç] al è il plui autorevul e cualificât tra i intaiadôrs de cussì clamade scuele tumiezine (Bepi Agostinis, Storie de art in Friûl); [Achil Telin al jere] un dai protagoniscj duncje de "scuele gjeografiche furlane", par dîle cun Francesco Micelli, che e viôt tant che personaç clâf la figure di Giovanni Marinelli (Donato Toffoli, Il lunari mai jessût - Tellini te prime vuere mondiâl)
5. s.f. (fig.) esperience che e insegne alc di impuartant:  la autonomie e je la uniche scuele di moralitât politiche, di onestât civiche, di cussience publiche pussibile in Italie (Josef Marchet, Autonomie e moralitât)
6. s.f. abilitât, capacitât o inteligjence, ancje maliziose:  Mamì, cuntun imprest a ponte, lu tuchignave [il mangjâ] cun scuele, viodint che ogni part a cuistàs il just colour (Stiefin Morat, Kebar krossè); Guido al tornà cu la scuse di viodi se Jacum, il so amì, al veve scrit, ma no coventave scuele par capî che no jerin lis letaris di Jacum che i interessavin, si ben Cechine (Roberto Ongaro, Cretevierte)
7. s.f. [FÛ] comunitât di personis che a fasin un stes mistîr, associadis di regulis di solidarietât e dispès di devozion a un sant protetôr
   Sin. fradaie , fraterne , confraternite
   
   1. simbul di chê comunitât puartât in procession
      Sin. confenon

Polirematichis e espressions idiomatichis

• fâ scuele loc.v.

Proverbis:

• cuant che il to mus al nasseve, il gno al leve a scuele
• cui che al vûl un bricon che lu mandi a scuele o ben a passon
• la esperience e je une grande scuele
• la miserie e je une grant scuele
• lis disgraciis a son une triste scuele
• se si à voie di vê un bon poltron, bisugne mandâlu a scuele o a passon