Dizionari de Lenghe Furlane

scjaldâsi  scjal|dâ|si  [AF]

1. v.pron.tr., v.pron.intr. scjaldâ une part dal cuarp, scjaldâ alc par se stes o dâsi calôr cun reciprocitât:  al si tirà dongje une vecje stue di modons e si scjaldà lis mans un moment (Carlo Sgorlon, Prime di sere); a fasevin il fûc par tiere e si sentavin ator ator par scjaldâsi (Cristina Noacco, Faliscjis)
2. v.pron.intr. deventâ cjalt o plui cjalt:  i fîi dulà che e passe la corint eletriche si scjaldin (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. riscjaldâsi
3. v.pron.intr. (fig.) fâsi cjapâ a fuart de rabie, dal gnervôs, de tension:  al tâs un pôc, al si imbonìs, si sfuarce simpri di no scjaldâsi, ma al mostre dut il dolôr de sô anime (Pieri Somede dai Marcs, Resurezion a Pontinie); alore Renato si scjalde: «Eh no, mate da la ostie […]» (Meni Ucel, Mieç purcit); Toni le tratave cul cit de mîl e al cirive di bonâle cuant che si scjaldave (Maria Forte, Mabile la Lunghine)
   Sin. piâsi , inrabiâsi , impiâsi , infogâsi , rabiâsi , imbilâsi , ingrintâsi , sustâsi , stiçâsi
   
   1. fâsi cjapâ de passion o di une altre emozion vive:  la femine si mostrave frede, foreste, nome di râr si scjaldave, e simpri tal jet (Carlo Sgorlon, Il dolfin); cumò i furlans no sintin cheste cjampane e no si scjaldin di front di chestis problematichis che pûr a son vitâls (Antoni Beline, Furlans pe Patrie)
      Sin. ecitâsi , sfogonâsi , impiâsi , piâsi , infogâsi , infervorâsi , emozionâsi , imboreçâsi
4. v.pron.intr. (fig.) di situazion e v.i., deventâ plui animât o plen di tension:  il dibatiment al è daûr a scjaldâsi (Claudio Sangoi, Un at politic pe mont); tal ultin cuart di ore dal prin timp l'incuintri si scjalde (Marc Stolf, Verona - Udinese 1-0)
   Sin. piâsi , impiâsi , inflamâsi , uçâsi , infogâsi , movimentâsi
5. v.pron.intr., v.pron.tr. [TS] sport fâ esercizis cuntun sfuarç limitât, par preparâ i muscui a une ativitât sportive o fisiche plui fuarte:  Conte […] al mande daurman Lukaku a scjaldâsi (Marc Stolf, Inter - Udinese 5-1)

Polirematichis e espressions idiomatichis

• scjaldâsi i cuars loc.v.
• scjaldâsi il brût loc.v.
• scjaldâsi il fiât loc.v.
• scjaldâsi il lat loc.v.

Proverbis:

• a messe là che al sune, a scjaldâsi là che al fume, a mangjâ là che al è pan e scjampâ là che si dan
• cuant che e cjape fûc la cjase no bisugne scjaldâsi
• cui che nol à frêt no si scjalde