Dizionari de Lenghe Furlane

roman  /-àn/  ro|man  [FO]

1. adi. de citât e de popolazion di Rome moderne e contemporanie
   
   1. che, cui che al è di Rome:  o tachìn a tabaiâ te nestre marilenghe e un doi romans aò aò a jerin une vore une vore une vore maraveâts pal nestri idiome (Checo Tam, Neapolis)
   2. in riferiment ae funzion di capitâl dal stât talian, sede di istituzions, struturis politichis, uficis e v.i.:  un personaç di chei che te jungle des Comissions e dai ents romans […] al veve cjatade une nicje (Adrian Cescje, Memoriis di politiche linguistiche); si à di intercetâ ducj chei che a scjampin stomeâts dai partîts romans (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
2. adi. di Rome, inte antichitât classiche, dal so domini politic e militâr, de sô culture e v.i.:  bastave nome regolâ une cuistion in Orient e alore lui al varès dominât dut il mont roman, lui, fi e erêt dal grant Maximianus (Checo Tam, Sol invictus); si viôt ancjemò un grant clap blanc, che al à la forme di une tombe romane (Pieri Menis, Lis leiendis di Buie)
   
   1. adi., s.m. che, cui che al fo citadin di Rome antighe o dal so imperi:  il Friûl al jere, duncje, abitât dai Carnics fintremai sul mâr. I Romans no fondarin Aquilee, ma a implantarin in chel sît une colonie latine (Josef Marchet, Cuintristorie dal Friûl fin sot la Italie); dome i Elens a podevin partecipâ [aes Olimpiadis], dal continent, des isulis o des coloniis che a fossin. Sot de dominazion romane a parteciparin ancje i romans (Adrian Cescje, Viaç aes origjins dal Logos)
      Sin. roman antîc
3. adi. relatîf a la citât di Rome come sede dal papât e centri dal catolicisim:  o savês che tal Martirologji de glesie romane, sants a 'nd è di ogni non (Francesc Placerean, La vite no je cuintriposizion di valôrs ma armonie di realtâts complementârs)
4. adi. spec. di numar, rapresentât cui simbui de scriture doprade par tradizion pal latin, ancje cun mudaments e integrazions dilunc dai secui:  lis casselis de pueste a vevin la steme de regjine cu la scrite ER II, là che il doi roman al sta par "Elisabete seconde" (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
5. s.m. [TS] tecn. pesut mobil che al scor dilunc dal braç de stadere par belançâ il pês dal ogjet di pesâ
   Sin. marc , plombin

Polirematichis e espressions idiomatichis

• a la romane loc.av., loc.adi.inv.
• gjavâse a la romane loc.v.
• gjavâsi a la romane loc.v.