ratatuie
/-ù-/
ra|ta|tu|ie
[CO]
-
s.f.
robe eterogjenie e di pôc valôr:
dôs stanzeatis a plan tiere cun alc di ratatuie dentri (Maria Forte, La cjase dal Murat);
par dîs e dîs al intivave dome peçots, butiliis e ratatuie di ogni fate, e dopo al saltave fûr alc [di anticuariât] che i reonave cuarante cjartis intun colp (Carlo Sgorlon, Prime di sere)
Cfr. catan
, tramai
, strafaniç
-
int o persone di pôc valôr o che al è pôc ce fidâsi:
chei siorets di citât che a 'ndi àn par mantignî chei des armonighis e chei des bulzichis e chei dai planets e tante altre ratatuie vignude sù cui sa dontri, a 'ndi varan salacor ancje par vô (Josef Marchet, Lis predicjis dal muini);
jê i rideve su la muse e i diseve che lis feminis a pretindin oms magari discolçs, ma di proposit sigûr e no vaiots e ratatuie di chê fate (Alan Brusini, Come tai romançs)