Dizionari de Lenghe Furlane

produzion  /-òn/  pro|du|zi|on  [FO]

1. s.f. il creâ, il produsi, il dâ dongje cun lavorazion agricule, artesanâl, industriâl e v.i.:  i implants di inricjiment a son necessaris pe produzion di urani fissil pes centrâls nucleârs, ma tal stes timp a coventin ancje par ûs militâr (Alessandro Pascolini, Un mont cence armis nucleârs. Sfidis sientifichis e tecnologjichis); il consumadôr, prin di comprâ, al vûl savê se la lavorazion e la produzion dal prodot a dipendin di une cundizion di sfrutament (Buteghe dal Mont, Luche Nazzi, Guide par un consum just e solidâl)
   Sin. fabricazion
   
   1. risultât di une lavorazion produtive:  la superficie che je coltivade a vignâl e je di uns 18.000 etars, cuntune produzion anuâl di vin che e passe di pôc il milion di etolitris (Enrico Peterlunger, Storie curte de vît in Friûl)
   2. il vê un efiet, ancje no volontari e no primari:  e si spere che, in curt, lis sagris e lis fiestis impen di jessi une cause spropositade di produzion di scovacis a deventin une ocasion zentîl di educazion ambientâl e sociâl (Redazion La Vita Cattolica, Pro loco ecologjichis)
2. s.f. elaborazion, formazion, tant che risultât di un procès biologjic, fisic, chimic e v.i.:  F. moniliforme e presente une buine amplificazion ma nissune produzion di fumonisinis (Romano Locci, Emanuela Gobbi, Lis fumonisinis - intosseants naturâi de blave in Friûl)
   Sin. formazion , svilup
3. s.f. complès des oparis fatis in cjamp artistic, spec. chês di un ciert autôr, di une cierte ete e v.i.:  Sauris, For di Avoltri e Valbrune, a jerin localitâts che [Giovanni Napoleone Pellis] si fermave par mês, dedicantsi a une ativitât sfolmenade, che e à dât une produzion di paisaçs une vore preseâts dai colezioniscj locâi (Bepi Agostinis, Storie de art in Friûl)
   
   1. singule opare artistiche o culturâl:  tal cors dai agns a son stadis plui di mil lis produzions sburtadis dal Premi Friûl inte leterature, inte musiche, intes arts visivis (Max Mauro, Un Friûl difarent: i 90 mhz di Onde Furlane)
4. s.f. complès des ativitâts economichis e di organizazion metudis in vore par fâ un film, un program de television, de radio, e v.i.:  i regjiscj e i produtôrs presints a Udin […] si son cjatâts dutun cui organizadôrs dal festival, par discuti su lis problematichis leadis ae produzion, al sostegn economic e la difusion dai lôr films (Fabian Ros, Jessût il numar 8 di "Segnâi di lûs")
   
   1. singule opare cinematografiche produsude:  il concors bienâl e internazionâl al è viert aes produzions di cine cun dialics e tescj che a sedin almancul pal 50% in lenghe minoritarie o in varietâts locâls (Fabian Ros, Babel Film Festival)
5. s.f. [TS] dir. il mostrâ in judizi
6. s.f. [TS] ling. emission di un sun o di un messaç:  i moviments dal sisteme orofaringjeâl responsabii de produzion di silabis a son colegâts a specifics mots de man (Giacomo Rizzolatti, Laila Craighero, Speculazions su la origjin dal lengaç)

Polirematichis e espressions idiomatichis

• lâ fûr di produzion loc.v.