premurôs
pre|mu|rôs
[CO]
-
adi.
che al à o che al mostre tantis curis e atenzions:
dute premurose pal so om e par nuie comandine (Maria Forte, Il Bide di Miot);
e veve sintude e viodude dute la sene. «Aio di clamâ il miedi?» e domandave a gno barbe, premurose e false. «Ce miedi! Ce miedi! Par chês robis li no si mûr!» (Pieri Menis, Agne Ursule)
Cfr. curient
, diligjent
, atent
-
adi.
[BF]
che al à presse, che al vûl fâ alc o finî alc in curt:
disot dai arbui e dai grancj ferâi alts si moveve sù e jù une code infinide di int premurose (Domeni Zannier, La crete che no vai)
Cfr. corint
, incorint
, impazient