Dizionari de Lenghe Furlane

morâl¹  mo|râl  [AF]

1. adi. che al à a ce fâ cu lis normis che si calcolin justis, no dome a nivel legâl, ma a nivel esistenziâl:  la ricostruzion materiâl e va indenant come il cai, chê morâl come il gjambar (Josef Marchet, Preambul rusin); al podarès capitâ un scjadiment morâl di dute la comunitât (Roberto Ongaro, Il muc); propit pal so rigôr morâl, al si jere creât une vore di nemîs personâi, ancje fra i siei stes paisans (Giovanni Pillinini, Zuan Batiste Cavedalis - Une vite esemplâr)
   Cfr. just , onest , virtuôs , etic¹
   
   1. che al rispiete chês normis:  [la globalizazion] in se no je ni morâl ni inmorâl. Al dipent cemût che e ven fate e cemût che le lassìn fâ (Antoni Beline, Globalizâ il locâl e localizâ il globâl)
2. adi. [TS] filos. che al tocje lis cuistions de esistence umane te sô relazion jenfri il ben e il mâl
   Cfr. etic¹
3. adi. che al inten la anime e la part spirituâl dal om:  dome cognossint ancje il dolôr, fisic e morâl, si cognòs la vite (Antoni Beline, Moments di ploie e di burlaç)
4. adi. che nol à un efiet o une sostance a nivel pratic e formâl, ma che al esist o al funzione a nivel psicologjic, solidari, carismatic e v.i.:  un impegn che dal sigûr al va di là dal sempliç ‘jutori morâl'o culturâl (Adrian Cescje, Memoriis di politiche linguistiche)
5. s.f. [TS] filos. part de filosofie o de religjon che e cîr di sclarî ce che al è il ben, ce relazion che si à di vê jenfri ben e mâl, cemût che si à di rivâ ae felicitât vere:  [Paulin di Aquilee] al duche Eric i dediche un tratât di morâl (Liber exortationis) (Diego Navarria, Patriarcjis fûr dal ordenari); in seminari al veve imparadis tantis robis, al saveve di morâl e di teologjie (Pieri Menis, Sul agâr)
   Cfr. etiche
6. s.f. complès di regulis che a ordenin il compuartâsi dal om in relazion a ce che al è ben e ce che al è mâl, che si ispire a concezions religjosis, politichis, filosofichis:  une morâl che e no sei un lambic o un clapon sul stomi, ma che e si adati a la misure dal puar om moderni (Pieri Piçul, Vieri e gnûf); al veve un concet di fier dal dovê e de morâl, par vie che la sô religjon lu cruziave cence pietât (Carlo Sgorlon, Il dolfin)
   
   1. osservance di chês regulis:  [Antoni Beline] no si piert a denunziâ i cediments de morâl publiche e privade ma chei dai pastôrs di animis e dai rapresentants dal popul che no stan de bande dal popul (Adrian Cescje, Memoriis di politiche linguistiche)
7. s.f. insegnament che si impare di une flabe, di une conte o ancje di un fat, di une esperience:  […] Morâl: lagrimis di femine, sudôr di cjaval e voiis di plavan nol è ce crodi, che al è dut fals e dut ingjan (Luigi Gortani, La bolp e il lôf)
   
   1. conclusion che si tire di un fat, di une situazion e v.i.:  barufe che si jere sparniçade ator pai curtîi tra cusins di prin e secont grât, che no vevin part in cause […]. La morâl e jere che a vevin gust di fevelâ de robe che, par no sei lôr, ur faseve inmò plui gole (Alan Brusini, Come tai romançs)
8. s.m. stât de anime, cundizion psichiche:  mi ricuardi che tu mi scrivevis letaronis par tignîmi sù il morâl (Pieri Somede dai Marcs, Tripoli bel sol d'amore); si veve procedût a internâ chês personis che a vignivin consideradis pericolosis pal morâl [dai soldâts e de popolazion in vuere] (Carli Pup, La seconde Irlande)

Polirematichis e espressions idiomatichis

• jù di morâl loc.adi.inv.