Dizionari de Lenghe Furlane

leture  /-ù-/  le|tu|re  [FO]

1. s.f. il cjalâ, il capî e in câs il pronunziâ un test scrit:  di man in man che e lave indenant cu la leture, la sô muse si faseve simpri plui maraveade, ma ancje plui malinconiche, fin che, finide di lei la letare, se strenzè sul cûr e si metè a vaî (Roberto Ongaro, Cretevierte)
   
   1. ativitât, costum di lei, spec. par imparâ o tant che passetimp:  cjapâ passion pe leture
   2. il lei a vôs alte un test, spec. par fâlu scoltâ a altris:  scoltâ une leture par radio; [par Suns Europe] si alternaran presentazions di libris, incuintris cui autôrs, leturis senichis, confronts poetics e trê spetacui (Erika Adami, Suns Europe al impie il Friûl)
   3. a scuele, ativitât e esercizi di lei:  in tierce o vevi il mestri Delfo, un omenon cu lis moschetis grisis, che nus faseve fâ bielis leturis (Alan Brusini, Come tai romançs)
2. s.f. maniere di capî e interpretâ un test:  une elaborazion teoriche [dal stât] che si poie intun prin moment su di une leture dal pinsîr aristotelic (Fabian Ros, La invenzion dal stât)
   
   1. maniere di interpretâ une cualsisei opare, fat, fenomen e v.i.:  la uniche leture plausibile di chel che al reste de aule Nord mi somee che e sedi chê proponude di Renato Iacumin (Christian Romanin, Il valôr di Aquilee al è vuê, te cussience di une identitât); un film inmagant cun plui nivei di leture e cuntune narazion che e cjape il spetatôr in mûts diferents (Fabian Ros, Profii_festival)
3. s.f. opare o part di opare fate o sielte par jessi lete:  Luzie Sasso di Dartigne, associade a Scuele Furlane, mi proponè di meti dongje un sussidiari di leturis in lenghe furlane (Adrian Cescje, Memoriis di politiche linguistiche)
   Sin. scrit
4. s.f. [TS] lit. toc de Biblie let inte prime part da la messe:  o viodês che i temis des leturis che o vin fatis a son za obleâts: il coragjo, il tignî dûr, e parcè che si è puare int no vin di pierdi ni il coragjo ni la fuarce di tignî dûr (Francesc Placerean, Il Friûl taramotât al à bisugne di ducj, ma al à di aministrâsi di bessôl)
5. s.f. [TS] polit. il lei un at uficiâl par frontâlu, discutilu, rispuindii o mendâlu e fâlu bon:  dopo dal vie libare dât dal Parlament in prime leture, cumò il test al veve di jessi votât une seconde volte (Carli Pup, Macedonie: rinviade la gnove leç linguistiche)
6. s.f. [TS] tecn., inform. rilevazion e ricognossiment di dâts cuntun dispositîf mecanic o eletronic:  erôr di leture imagjin disc (Fabio Tomat, www.gitlab.gnome.org)
7. s.f. rilevazion dal valôr dât di un strument di misure:  nol è stât pussibil rilevâ la leture dal contadôr e in mancjance di autoleture dal utent, e ven regjistrade une leture aprossimade su la fonde dai consums storics (Aministrazion Publiche, www.irisacqua.it)
   Sin. rilêf¹ , rilevazion