Dizionari de Lenghe Furlane

lavatîf  la|va|tîf  [CO, TS]

1. s.m. med. cure che si fâs introdusint licuits par vie anâl e licuit che si introdûs par vie anâl:  cul fâti un lavatîf / cul scliçot di saûl / ti vuarirai lu cûl / par un bon pieç (Florendo Mariuzza, Contrast tra Carnevâl e Cuaresime malade); lavatîfs, salàs, rimiedis / devin jessi a bataion (Toni Broili, Academie des massariis)
   Sin. scliçot , clisteri , serviziâl , scliç , sotratîf
2. s.m. [BF, FÛ] imbroi, in particolâr acuist li che si compre alc che al vâl une vore mancul dal presit:  mi ha mitût un lavatîf cun chei cjavai (Giulio Andrea Pirona, Novo vocabolario friulano)
   Sin. bolade , fotude , imbroi , impirade , inculade , ingjan , menade , stoc¹ , taconade , rangjade , freolade , imbolognade , imbrucjade , comedonade , gabade , freade
3. s.m. [BF, FÛ] cui che al stufe:  al è un vêr lavatîf chel vuestri amì (Giulio Andrea Pirona, Novo vocabolario friulano)
4. adi., s.m. (fig.) che, cui che nol à voie di fâ, di lavorâ, di impegnâsi:  i piês [alpins] a jerin chei dai mûi che ju clamavin la «aviazion». Volontaris cui mûi par fâ i lavatîfs, sporcs lorts plui dai cogos, une peraule e vot blestemis (Alan Brusini, I universitaris)
   Sin. flacjon , pelandron , poltron , sflacjon , pucefadie , smucefadie