Dizionari de Lenghe Furlane

lôf  lôf  [AF]

1. s.m. mamifar salvadi carnivar, lat sient. Canis lupus, progjenitôr dal cjan, che pal solit al vîf in brancs, dispès presint ancje tes flabis:  e el jeur a zic-zac al cor al cor e el lôf a pene che al gji pol stâ daûr (Dolfo Zorzut, No si devi mai ridi prime da la ore); "O compari lôf, cemût staiso?" e scomence la bolp, che e jere plui barone. "Di salût jo stoi benon, - i rispuint il lôf - ma no mi vergogni a dîus, al è culì trê dîs che no ai cercjât bocjade" (Luigi Gortani, La bolp e il lôf)
   
   1. (ancje fig.) in metaforis o paragons par dî di cdn. o di alc trist, che al fâs pôre:  "Anìn, po. Nol è mighe il lôf che ti mangje, ca dentri" (Gianni Gregoricchio, Îr e doman); "Ma jo, Heleni, no ai un parcè di vê pôre dai todescs". "Pal amôr di Diu, Sandri, no stâ sei frut… Cîr di vê pôre invezit, … che, chei là a son lôfs" (Maria Forte, Cjase di Dalban)
   2. (ancje fig.) in metaforis o paragons par dî di cdn. che al mangje tant e cun tante fam:  jerin daur a sbasofiâ il risot tant che tancj lôfs (Giovanni Gortani, A la sagre di Mion)
2. s.m. cjan di pastôr todesc o cjan di altre raze che si somee cul lôf salvadi
   Sin. cjan lôf , cjan lupin
3. adi. plen di voie, brame, fam:  Paulut, che al à une fam love, i dîs […] (AAVV, Lis aventuris di Paulut tal Ream Langobardorum)

Polirematichis e espressions idiomatichis

• cjan lôf loc.s.m.
• fâ di cjan e di lôf loc.v.
• lôf di mâr loc.s.m.

Proverbis:

• al lôf il cjan i mostre i dincj
• al va a finîle mâl chel lôf che al à une sole tane
• al vîf tant il jeur a jerbe che il lôf a cjar
• ancje il lôf al cîr la sô cove
• cjan nol baie di lôf
• cualchidun di un côf bisugne dâjal al lôf
• cuant che a son sposâts, il lôf ju à mangjâts
• cuant che al nevee, il lôf al predicje
• cuant che il lôf al devente vieli, i cjans i pissin intor
• cuant che il lôf al jes dal so foran, o che al à sêt o che al à fam
• cuant che si è cul lôf, si scuen urlâ
• cuant che si fevele dal lôf, al capite
• cuant che si nomene il lôf al è ca
• cuant che tu viodis il lôf, no stâ lâ a cirî la ferade
• cui che al va cul lôf al impare a urlâ
• cui che si fâs piore il lôf lu mangje
• cul lôf si è, cul lôf si urle
• di un avâr tu puedis sperâ alc, di un lôf no stâ sperâ nuie
• ducj a àn coraç cuant che il lôf al scjampe
• e va tant la cjavre çuete, che il lôf le intope
• fati piore e il lôf ti mangjarà
• fi sôl: o mat o lôf
• il lôf al mangje pioris contadis
• il lôf no i domande al pastôr che i dei lis pioris
• il lôf nol mangje il confin
• il lôf nol mangje il tiermin
• il zurament dal lôf se al dure une ore al dure trop
• in câs di necessitât ancje il lôf al mangje moscjis
• l'om che si fâs piore il lôf lu mangje
• la fam a fâs jessi il lôf de tane
• la muart dal lôf e je la fortune des pioris
• la muart de piore e je la fortune dal lôf
• malguvier al pas il lôf
• muarte piore, fortune dal lôf
• ni il cjalt ni il frêt il lôf no ju à mangjâts
• ogni lôf al à il so côf
• putrops lôfs a stan pôc a mangjâ une piore
• trops lôfs a stan pôc a distrigâ une piore
• trops lôfs tor di une piore le àn prest distrigade
• ucii il cjan al lôf se tu vûs che no ti vegni cuintri