Dizionari de Lenghe Furlane

fumâ  fu|mâ  [FO]

1. v.intr. produsi o mandâ fûr fum o vapôr:  un ramut di vualîf al fumava su cuatri boris fra la cinisa (Federigo Comelli, Il me paîs); e za culì e culà / e fumin i cjamins, / ardin i fogolârs dei contadins, / e ducj pense a cenâ (Pieri Çorut, La gnot di Avrîl); dopo de vuere, no ai mai viodût il Vesuvi a fumâ (Vico Bressan, Cîl e aghe); e fumave la mignestre, fisse, cjalde (Gianni Gregoricchio, Îr e doman); al bute su la schene de cjavale, che e fumave di sudôr, une sfilzade (Pieri Somede dai Marcs, Dure leç)
   Sin. fumulâ
2. v.tr. (ancje ass.) tirâ sù e butâ fûr il fum di tabac o di altris sostancis:  Checo ju veve consumâts ducj chei che al veve par finî di fumâ un maladet di sigar che al veve sintût il siroc e nol tirave; e cuant a Valantin che nol fumave, al ere râr il câs che al puartàs fulminants cun se (Giovanni Gortani, La teme - Une gnot intun cjastiel); siôr Tite si distire te poltrone e al fume la pipe (Arturo Feruglio, Un grop sul stomi); il miedi mi à dite che se no le finìs di fumâ, o mûr in curt (Alan Brusini, Amîs come prime)
   Sin. pipâ , bugâ
3. v.tr. [CO, TS] alim. tratâ cul fum alc di mangjâ, di mût che al duri plui timp:  [i fruts] a lavin a passon, a molzevin, a netavin lis lozis cul rali, a comedavin tamars, a ingrumavin zenevre par fumâ la scuete (Margherita Timeus, Gianni Colledani, Casâr? No, «perfezionadôr»…)
   Sin. fumulâ
4. v.tr. (fig., zerg.) lâ une vore plui svelt di cdn. o di alc e lassâlu indaûr:  ancje chê volte i amîs lu vevin fumât. A jerin lâts jù in bombe cence spietâlu (Cristina Noacco, Faliscjis)
   Sin. dâ il fum
   
   1. fâ une vore svelt un percors, une trate:  intun amen al veve fumât un pâr di chilometris e al jere jentrât te fasse periferiche urbane (Marc Stolf, Al è simpri cualchidun che al è "plui mancul" di te)
5. v.intr. (fig.) fâ gnervôs, fâ rabie:  mi fume, savêso, di no podê molâi cuatri scapelots (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. brusâ
   
   1. di cdn., vê rabie, rabiâsi:  une peraule in stuart lu fâs fumâ (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Cfr. vignî sù il fum
6. v.tr. robâ, puartâ vie alc che al è di cdn. altri:  intant che o mi soi voltât, al mi à fumât il tacuin che o vevi poiât su la taule (Giulio Andrea Pirona, Novo vocabolario friulano)
   Sin. gratâ , foti , robâ , inculâ , taconâ , freolâ , sfreolâ , freâ

Polirematichis e espressions idiomatichis

• fâ fumâ la beche loc.v.
• fumâ il cjan loc.v.
• fumâ la beche loc.v.

Proverbis:

• a fûc là che al fume, a messe là che al sune
• a messe là che al sune, a scjaldâsi là che al fume, a mangjâ là che al è pan e scjampâ là che si dan
• cuant che a fumin lis risultivis, siroc soterani
• dulà che al fume al è fûc
• dulà che al fume alc si bruse
• no stâ fumâ se tu vûs campâ
• nol è dut rost ce che al fume
• nol è rost dut ce che al fume
• par scjampâ de miserie si à di lâ là che a son cjamins che a fumin e no cjampanii che a sunin