doi
/-ò-/
doi
[FO]
-
s.m.
numar che al corispuint a une unitât plui une altre unitât e segn che lu rapresente:
trop fasial doi plui doi? (Checo Tam, Sense);
lis casselis de pueste a vevin la steme de regjine cu la scrite ER II, là che il doi roman al sta par "Elisabete seconde" (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
-
adi.num., pron.num.
in cuantitât di une unitât plui une altre unitât, ancje cun valôr sostantivât o cun sostantîf sotintindût:
si gjavà une manece par viodi cun doi dêts sul cuel se si sintive il cûr a bati (Fabian Ros, Un piçul particolâr);
a cjaval tra il Cuatricent e il Cinccent la nobiltât furlane si cjate dividude in dôs fazions: i Strumîrs e i Çambarlans (Carli Pup, Il Friûl de Joibe Grasse dal 1511);
doi di lôr, intant, che il pichet si meteve sul atenti e al presentave i fusîi, a poiarin la zoie tor dal monument (Meni Ucel, Il discors);
al imbrincà il volant cun dutis dôs lis mans (Franco Marchetta, Light my Fire)
-
adi.num., s.m.
ancje cun valôr di ordenâl o identificatîf intune serie o intune categorie:
une leç che e varès vût di judâ scuelis, comuns, radios e televisions a promovi une programazion in lenghe, dal rest come che la Costituzion e predicjave bielzà tal articul doi (Angelo Floramo, Cuintristorie dal Nûfcent 1990-2000);
o vin viazât sul doi, il bus che al va a Felet (Oscar Puntel, Cartei bilengâi Saf scancelâts: l’efiet Penelope de politiche linguistiche regjonâl)
-
adi.num., pron.num.
in cuantitât piçule:
segretari, che al buti jù dôs riis di verbâl (Pieri Somede dai Marcs, A è lade cussì…);
il cjistiel di Udin al è li a doi pas (Dino Virgili, Friûl di Viarte)
-
adi.num., pron.num., s.m.pl.
riferît a personis al pues sotintindi che jenfri di lôr e je une relazion sentimentâl o di amistât:
nô doi si jerin inamorâts un cun chel altri, tant che o vevin decidût di cjolisi (Fabian Ros, Il lôf);
no stâ a viodi piês di ce che al è. Il vuestri al è il mâl di doi che no san cjapâsi il caratar (Maria Forte, Cjase di Dalban)
-
s.m.
spec. tal pl., la seconde zornade di ogni mês:
ai doi di Fevrâr dal 1968, si riunive la prime Assemblee dal Consorzi pe costituzion e pal disvilup de Universitât di Udin (Angelo Floramo, Cuintristorie dal Nûfcent 1960-1970);
al jere il doi di Zuin, il so complean (Jolanda Mazzon, Di là de rêt)
-
il secont an di un secul:
Josef Marchet al jere nassût dal doi
-
s.m.
votazion scolastiche negative:
cjapâ doi te interogazion
-
s.m.
cjarte di zûc dopo dal as:
al jere colât il doi di spadis, ma la cjarte e jere cussì smamide che tu viodevis dome la crôs (Cristina Noacco, Faliscjis);
trê dois cun chê di cope e fâmi fâ capot di Gjovanin po ve! (Arturo Feruglio, Un grop sul stomi)
Polirematichis e espressions idiomatichis
Proverbis:
- a fâ il cont cence l'ostîr, si fasilu dôs voltis
- a fâ un plasê, si cjape doi displasês
- a lâ a marît a vuelin doi cjaçuts: un di fridi e un di vaî
- a ogni fantate i stan ben doi solt di tentimbon
- a san plui doi che no un
- a vê il morôs e je une crôs, a no vêlu a son dôs
- a viodin plui cuatri voi che no doi
- a vuelin dôs cjampanis par sunâ parie
- a vuelin dôs robis par fâ stâ ben une cjase: predi e purcit
- ai doi di Fevrâr tante nêf che al è clâr
- centesim sparagnât, dôs voltis vuadagnât
- cuant che no 'nd è une, a 'nd è dôs
- cuant che si crôt di là un pas indenant, si va doi indaûr
- cuatri voi a viodin plui di doi
- cui che al à creance al campe un an, cui che no 'nd à al campe doi
- cui che al bastone che al ledi cun doi sacs
- cui che al da daurman al da dôs voltis
- cui che al done al ingrât al piert dôs voltis
- cui che al fâs il cont denant l'ostîr lu fâs dôs voltis
- cui che al lavore al à une cjamese e cui che nol lavore ind à dôs
- cui che al servìs doi parons nol servìs nissun
- cui che i done al ingrât, al piert dôs voltis
- cui che si sente sun dôs cjadreis dispès al cole par tiere
- cuntune sole fave no si po cjapâ doi colomps
- Diu nus vuardi dal sut tra lis dôs madonis
- doi gjai intun gjalinâr no stan ben
- doi muts no puedin intindisi
- doi neris a fasin stâ ben la famee: predi e purcit
- doi nûts no si puedin vistî
- doi pitocs suntune puarte no stan ben
- doi pîts no stan ben intune scarpe
- doi pôcs e un nie a puedin bastâ a fâ siôrs
- doi pôcs e un nuie a bastin a fâ scjas
- doi viaçs dongje la aghe, trê tal mulin, e un di vicin
- dôs disgraciis a son siguris: la muart e lis tassis
- dôs feminis e une ocje a fasin un marcjât
- dôs robis a son buinis daspò muartis: avâr e purcit
- fra doi litighents il tierç al gjolt
- il cjan di doi parons al mûr di fam
- il peçotâr al va simpri cun dôs bisacjis
- in vuere si va cun doi sacs: un par dâlis e un par cjapâlis
- l'agnel umil al tete dôs maris, chel sofistic nancje la sô
- l'om al à nome doi braçs
- la vacje dal puar e crepe e chê dal siôr ind fâs dôs
- miôr misurâ dôs voltis che no falâ une
- nissun nol po servî doi parons
- no si dîs doi, fin che nol è tal sac
- no si po servî doi parons
- ogni surîs e à dôs busis
- Sant Benedet un par sorte, doi par jet
- se a 'nd ves e se a 'nt fos a jerin doi fradis e no si vignivin nuie
- se il Signôr al siere une puarte, ind vierç dôs
- si à simpri di lâ vie cun doi solt di mincjon te sachete
- si dîs dôs voltis dongje da la aghe e trê tal mulin
- si dîs dôs voltis tal mulin
- tes barufis si va cun doi sacs: un par dâlis e un par cjapâlis
- tra i doi che a cavilin, il tierç al sta in capitâl
- un matrimoni fra doi zovins al è un matrimoni dal Signôr, un matrimoni fra doi viei al è un matrimoni di mierde, un matrimoni fra un zovin e un vieli al è un matrimoni dal diaul
- un vuarp che al mene un altri vuarp a colin ducj i doi te buse
- une e nissun, doi e un, trê si scomence a imparê, cuatri si scomence a scombati
- une man e lave chê altre e dutis dôs a lavin la muse
- une volte si je fâs a ducj, dôs a cualchidun, trê a dinissun
- vuarditi di chei di dôs musis