Dizionari de Lenghe Furlane

di sfrôs    [CO]

1. loc.av., loc.adi.inv. cence rispietâ lis normis, soredut cence paiâ dazis, impuestis, tassis o ancje robant:  si vistivin cun robe vignude fûr di sfrôs di cualchi magazen militâr (Gianni Gregoricchio, Lilie)
   
   1. di cdn., che al fâs alc cence rispietâ lis normis, soredut cence paiâ dazis, impuestis, tassis:  un zovin di Cleulis che al jere cjaçadôr di sfrôs (Pierluigi Visintin, La storie di Amos e Riche)
   2. di marcjanzie, impuartade, fate o vendude cence rispietâ lis normis, soredut cence paiâ dazis, impuestis, tassis o ancje dopo di jessi stade robade
2. loc.av. cence fâ savê, cence fâsi scuvierzi:  o vin riscjât la vite e lui plui di me, par jentrâ di sfrôs fra i umans par cognossi lis lôr intenzions (Roberto Ongaro, Il pecjât di Mosè)
   Sin. di scuindon , in scuindon , a sfrôs , di riscôs
3. loc.av., loc.adi.inv. dome par pôc timp:  al jere vignût jù legri dal so paîs / sot lis fiestis cuntun pâr di cjartis di dîs / cusidis tal gjilè, par viodilu, magari di sfrôs, / e saludâlu un minût (Ercole Carletti, La gnot di Nadâl)
   Sin. di corse , di sbris , di sbrisson
4. loc.av., loc.adi. in maniere margjinâl, in câs ancje improprie:  "Il câs dal Valdrade, culì, al jentre di sfrôs, Sgobar, cul argoment plui impuartant..." (Alviero Negro, Int di masnade)
   Sin. di sbris , di sbrisson

Components:

• sfrôs s.m.