Dizionari de Lenghe Furlane

dam  dam  [FO]

1. s.m. efiet negatîf patît di personis o robis:  Telefon vert - al conte Adriano Venturini - e jere une trasmission di bataie. Si schieravin in maniere vierte cu la int che e faseve la denunzie, cuintri dal dam al ambient (Max Mauro, Un Friûl difarent: i 90 mhz di Onde Furlane); se a 'nd è masse, se si moltiplichin masse, al va a finîle che a fasin plui dam i gjats tal salam e tal formadi che no lis pantianis sul cjast e tal camarin (Riedo Pup, Pantianis di cjase e gjats di fûr vie); no fâs tant dam la tampieste come lis malis lenghis (Maria Forte, Cjase di Dalban); e jo zito, parcè che se i rispuindevi, o fasevi un dam sore chel altri (Antoni Beline, Pre Pitin)
   Sin. discapit , prejudizi , vuast² , mâl , malan
   Var. damp , dan²
2. s.m. bêçs paiâts in risarciment di un efiet negatîf:  intant i dams di vuere no rivavin, e cuant che a rivavin a finivin dispès dome tes sachetis dai siôrs (Carli Pup, La seconde Irlande)
3. s.m. [CO, TS] dir. lesion dai dirits o interès di altris sogjets causade di un compuartament contrari al dirit
4. s.m. [CO, TS] med. alterazion negative di une part dal cuarp:  patî un dam cerebrâl
   Sin. alterazion , devastazion , disfunzion , lesion

Polirematichis e espressions idiomatichis

• fâ dam loc.v.
• in dam loc.av.

Proverbis:

• amicizie cul dam lassile lâ al malan
• cui che al è coion so dam
• cul perdonâ ai triscj si puarte dam ai bogns
• fami fatôr un an e se no mi fâs siôr, gno dam
• il martar là che al sta nol fâs dam
• mierde montade in scagn o che a puce o che a fâs dam
• no i mancje la burle a cui che al à il dam
• nol è negozi in tiere che al puarti plui dam de vuere