Dizionari de Lenghe Furlane

confront  /-ònt/  con|front  [FO]

1. s.m. osservazion e valutazion dôs o plui robis diviersis, cun atenzion par chês che a son lis someancis e chês che a son lis diferencis:  nol è facil sei puars cence patî tal confront cu la bondance dai amîs (Maria Forte, La tiere di Lansing); cuant che in Friûl e je rivade la Italie a àn stât pôc a fâ il confront reâl e pratic fra la aministrazion austriache e chê taliane (Riedo Pup, Franz Josef e Garibaldi); o vin fat il confront di posizions une vore diferentis e o sin rivâts a une cunvigne, no parcè che ducj o sein rivâts a acetâ dut ce che al è scrit achì, ma parcè che o vin capît che ducj o vevin di rinunziâ a alc des nestris convinzions se o volevin dâi ae lenghe furlane une ortografie unitarie (Xavier Lamuela, La grafie furlane normalizade)
   Sin. cuintripont , comparazion , paragon
2. s.m. discussion fra personis che a àn ideis, progjets, intenzions, visions dal mont diferentis:  il confront - magari ancje critic e vivarôs - al è une fuarce che e sburte a fâ miôr lis robis (Mario Dutto, Scuelis di cualitât e lenghis di minorance. Une riflession su la lenghe furlane intes scuelis); di li indenant si vierç un confront cu la Regjon par vê un ricognossiment uficiâl, che al permetedi un finanziament fissât al principi di ogni an, come che di simpri, par esempli, al sucedeve pe Societât Filologjiche Furlane (Max Mauro, Un Friûl difarent: i 90 mhz di Onde Furlane); o noti une assence di ocasions di vêr confront fra cui che le pense in maniere divierse: assence di confront e duncje dialic (Dree Venier, Fabio Pizzul: Un furlan il prin… a Milan)
   Sin. incuintri²
   
   1. situazion competitive, ancje tal sport o in altris situazions:  lis dôs scuadris si son impegnadis intun confront dûr, ma in gjenerâl coret
      Sin. incuintri²

Polirematichis e espressions idiomatichis

• tai confronts di loc.prep.

Proverbis:

• i confronts a son simpri odeôs
• no bisugne mai fâ confronts