clamâsi
cla|mâ|si
[FO]
-
v.pron.intr.
doprâ la vôs par fâ vignî dongje o par vê la atenzion un cun chel altri:
e vignì la gnot di Nadâl: une gnot clare come il lat, e sul tart la int involuçade tal tabâr e lave a Madins clamantsi di cjase in cjase (Alan Brusini, Il coragjo de sclope)
-
v.pron.intr.
vê un ciert non o une cierte denominazion:
si clamave Vigji Brusin e al jere di Modot, il borgut cuiet e biel daûr di Morùs (Riedo Pup, Vigji Brusin);
mi clami Evelin! Bundì, siôr president! (Gianfranco Pellegrini, Evelin);
saressial normâl se il gjornâl plui let de Campanie, cun sede a Napoli, si clamàs "Messaggero Lucano"? (Sandri Carrozzo, Il Friûl tra conflit invisibil e alienazion);
i siei vins no son Tocai o Merlot, che za ducj a cognossin ben, ma si clamin Cjanorie, Scjaglin, Cividin, Ucielut (Redazion il Diari, Il paleontolic dal vin furlan);
il strât che al rivuarde la meteorologjie, come che o vin za viodût, al è chel plui bas, chel che al è a contat cu la superficie terestre: si clame Troposfere (Stefano Micheletti, Marcellino Salvador, Notis di meteorologjie pal Friûl - Vignesie Julie)
Sin. vê non
-
v.pron.intr.
in espression enfatichis, jessi considerât, classificât, o ancje dome jessi:
l'articul 108 che al meteve il Friûl tal numar des Regjon par cont so, ma sot di chê molene che si clame la autonomie normâl (Josef Marchet, Furlans autonomiscj platonics);
o jeri zovin, e o vevi chel che si clame entusiasim creatîf, chel che si à cuant che si invie alc di gnûf (Adrian Cescje, Memoriis di politiche linguistiche)
Sin. dîsi
-
v.pron.intr.
dâsi un non, un titul, une cualifiche e v.i.:
i vescui di Aquilee a scomençarin a clamâsi «patriarcjis» come in Orient (Josef Marchet, Cuintristorie dal Friûl fin sot la Italie)
-
v.pron.intr.
considerâsi:
e ancjemò i nestris vecjos a garantissin che lôr a puedin clamâsi fortunâts, parcè che, prime di lôr - come che a contavin i lôr vons - a jerin stâts timps ancjemò plui crûts (Riedo Pup, I furlans e la fam)
Sin. dîsi
, considerâsi
, calcolâsi
, tignîsi
Polirematichis e espressions idiomatichis