cjucjâ
cju|cjâ
[CO]
-
v.tr.
(ancje ass., fam.)
cjapâ in bocje, soredut par bevi o sintî il savôr, cun moviments de bocje che a crein une depression interne e une aspirazion:
o cjalavi i siei lavris che a si strenzevin come tune bussade cjucjant la bibite cul fros (Alan Brusini, Gian Paolo Linda, I forescj);
[i fruts] a mastiin panevin, dolcemare, jarbe di madone; a cjucjin sups, a bevin cu lis mans tal riul: ogni cise e à i siei regâi (Dino Virgili, La aghe da pît la cleve)
Sin. supâ
-
cjapâ il lat di tete, o dal biberon:
[il frutin] lu cjalave, tirant i voglons, dismenteantsi une vore di voltis di cjucjâ e cumò la sô musute e començave a iluminâsi di ridi (Pieri Menis, Sul agâr)
Sin. tetâ
-
bevi alcolics, ancje in cuantitât esagjerade, tant che vizi:
Baldo Cuartut al à scomençât zovin a cjucjâ e, viodêso là che il clinto lu à puartât? (Roberto Ongaro, Cretevierte)
-
v.tr.
fâ une stimolazion orâl par dâ plasê sessuâl
Sin. supâ
-
v.tr.
(fig.)
cjapâ alc, materiâl o ancje imateriâl, cun ripetizion, insistence, ostinazion e v.i., ancje cuintri di ce che al è just:
"Achì a àn di dânus di lavorâ… Culì, o sin obleâts a paiâ lis tassis, culì o lin soldâts, e culì, sacrament! o vin di lavorâ… E no cjucjânus ancje i bêçs che o mandìn a cjase di vie pal mont! …" (Dino Virgili, La aghe da pît la cleve)
Sin. supâ
, molzi